Endama Komîteya Amadekar a Newrozê Gulşen Ozer a li ser navê komîteyê axivî û Newroza Rojava, Rojhilat, Bakur, Başûr û Rêberê Gelê Kurd Abdullah Ocalan pîroz kir.
Li Qada Newrozê ya navçeya Rezan a Amedê, bi dirûşmên “Newroza azadî û yekitiya demokratîk” û “Newroza azadî û demokrasiyê” pîrozbahiya Cejna Newrozê tê lidarxistin. Ji bo cangoriyên azadî û demokrasiyê deqîqeyek rêz hate girtin. Dû re girseyê bi yek dengî dirûşma “Şehîd namirin” berz kir.
‘Gelê Amedê dizane dê li kû bisekine’
Dû re ewilî Endama Komîteya Amadekar a Newroza Amedê Hevseroka DEM Partiyê ya Amedê Gulşen Ozer ku li ser navê komîteya amadekar axivî wiha got: “Digotin barane wê kes neye lê em dibînin ku vaye qad tejî bûye. Gelê Amedê dizane ku dê li ku bisekine. Îro ne berf kevir jî bibarin em ê Newroza xwe pîroz bikin. Em ji Serok Apo re silavan dişinin dibêjin Newroza te pîroz be Serok Apo. Em silavên xwe ji Rojava, Rojhilat, Bakur û Başûr re dişinin û dibêjin Newroza wan pîroz be. Newroza me pîroz be.” Dû re girseyê diruşmeya, “Newroz pîroz be” berz kir.
Hevşaredaran Newroza gel pîroz kir
Hevşaredara Bajarê Mezin a Amedê Serra Bûcak axivî. Serra Bûcak Newroza Amedê pîroz kir û wiha got: “Hûn bi xêr hatin li ser serê me ser çavên me hatin. Em bi we serbilind in. Cejna we ya remezanê jî bi dil û can pîroz dikin. Bimînin di nav xêr û xweşiyê de.”
Hevşaredarê Bajarê Mezin ê Amedê Dogan Hatûn jî Newroza Amedê pîroz kir û wiha got: “Amed hûn ne tene Amed in , Hewlêr Silêmanî Mehabad û Efrîn in. Newroza Efrîn, Silêmanî û Mehabadê pîroz be. Mevanên qedirbilind di nava me de ne. Hûn bi xêr hatin. Dengê azadiyê ji kolanê we tê Amed. Guhê cîhanê li we ye. Dengê xwe li cîhanê belav bikin.”
Dû re li ser navê hemû girtîgehên li Bakurê Kurdistan û Tirkiyeyê peyama Denîz Kaya hate xwendin. Girseyê bi slogana, “Bijî Serok Apo” û “Bijî Kurdistan” bersiv da peyama girtiyên siyasî.
Dîlan û Erkan Top derketin ser dikê
Piştî xwendina peyama Denîz Kaya Hunermend Dîlan û Erkan Top derketin ser dikê. Gel li ber stranên hunermendan dest bi dîlonê kir.
