Amedaporê ji bo sezona nû lez daye transfera futbolîzan. Niha jî futbolîzê forvetê Gift Orban transfer kir. Vîdeoya lansmana Orban balê dikişîne ser xwe ku li Medreseya Sor a li Cizîrê hatiye amadekirin.
Amedspor a ku amadekariyên xwe yên sezona nû dewam dike, di çarçoveya xebatên transferê de lîstikvanê hicûmê ango forvetê Gift Orban tev li kadroya xwe kir.
Rêveberiya klûbê derbarê transfera Gift Orban de li ser hesabê xwe yê medyaya dîjîtal transfera futbollerê xwe yê nû ragihand. Amedsporê di parvekirina xwe got, “Tu bixêr hatî Gift Orban.”
Amedsporê ji bo xurtkirina xeta xwe ya pêş ango forvetê bi santraforê Nîjeryayî Gift Orban re peymana fermî imze kir. Lîstikvanê 24 salî ku di tîmên girîng ên Ewropayê de tecrûbe bi dest xistiye tev li karwanê Amedsporê bû.
Îcazeta xwe ji Melayê Cizîrî girt
Di vîdeoya ji bo lansmana Orban de weke mekan Medreseya Sor ku tirbeya helbestvanê mezin Melayê Cizîrê lê ye hatiye bikaranîn. Her wiha Melayê Cizîrî û Ehmedê Xanî li vir perwerde stendine û pewrede lê dane. Hate zanîn ku Amedsporê bi zanebûn mekanê Medreseya Sor bikar aniye û mîna ku Orban îcazeta xwe ji Melayê Cizîrî wergirtiye dest bi kar kir.
Amedsporê ji bo sezona pêşiya me heta niha 10 transferên nû kiribûn. Bi Orban re 11 transferên nû çêbûn.
Navên futbollerên ku transfer bûne, ev in:
Alban Lafont (kalevan), Mustafa Burak Bozan (kakevan), stoper David Bates, Lumbardh Dellova, Amadou Cissé û Umut Meraş, nîv-qadgêr Rayan Raveloson, Furkan Soyalp, Ermal Krasniqi û Berk Kizildemîr.
