Mêrdîn – Gelê navçeya Qoserê têkildarî peymana di navbera HSDê û Hikumeta Demkî ya Şamê de hate îmzekirin axivîne, diyar kirin ku Peyman bi saya berxwedana gelê Kurd hate îmzekirin û xwestin ku heta Rojava azad bibe her kes li ser pêyan be.
Bi boneya 1ê Sibatê Roja Piştevaniya bi Rojava re ya Cîhanê li gelek bajarên Kurdistanê û li welatên ku Kurd û dostên wan lê dijîn daketin kolanan û hem ev roj pîroz kirin hem jî careke din piştevaniya bi Rojava re anîn ziman. Yek ji bajarên ku ji bo Rojava meş lê hate lidarxistin û daxuyanî hate dayîn jî navçeya Qoserê ya Mêrdînê bû. Welatiyên ku tev li meşê bûn têkildarî peymana ku di 30ê Çileyê de di navbera Hêzên Sûriyeya Demokratîk (HSD) û Hikumeta Demkî ya Sûriyeyê de hate îmzekirin ji ajansa me re axivîn. Welatiyên ku bi îmzekirina vê peymanê keyfxweşiya xwe anîn ziman û xwestin ku êdî şer çênebe, kes nemire û aştî çêbibe.
‘Heta ku Rojava azad bibe divê her kes li ser pêyan be’
Welatiyan destnîşan kir ku Bakur û Rojava weke goşt û neynûkê ne, Qamişlo û Nisêbîn yek in û bang li gelê Kurd kirin ku bibin yek deng. Welatiyan bi lêv kir ku ew naxwazin êdî li ser welatê wan şer çêbibe û anîn ziman ku dilê wan bi Rojava re ye. Welatiyan diyar kir ku heta damlayeke xwînê di laşê wan de hebe dê bi Rojava re bin. Qoseriyan xwest ku heta gelê Rojava azad bibe her kes li ser pêyan be. Welatiyan bi lêv kir ku peymana hatiye îmzekirin ji bo pêşî li komkujiyê bigire baş e û peymana hatiye îmzekirin bi saya berxwedana gelê Kurd çêbûye. Welatiyan her wiha xwest ku gelê Kurd yekîtiya xwe ya neteweyî pêk bîne.
