Şirnex – Mehmet Salih Erden ê ku sala 1995an li Hezex hatibû girtin, piştî 30 salan girtî ma hat berdan. Erden ê bi awayeke girseyî hatiye pêşwazîkirin anî ziman ku azadiya wî azadiyeke fîzîkî ye û azadiya rasteqîn dê bi welatê azad û Rêbertiya azad pêk were.
Mehmet Salih Erden ê di 1995an de li navçeya Hezex a Şirnexê hatibû binçavkirin, cezayê muebetê lê hate birîn û piştî 30 salên girtî, şevê din ji Girtîgeha Tîpa F ya Xarpêtê hat berdan. Endam û rêveberên TUHAD-DERa Şirnexê, Parlementerê DEM Partiyê yê Şirnexê Mehmet Zekî Îrmez, endamên û rêveberên partiyên siyasî, saziyên civaka sivîl, malbat û gelek kesan li bajaroka Erebanê Mehmet Salîh Erden pêşwazî kirin.
Girse piştre derbasî mala Mehmet Salîh Erden a li taxa Tûrgût Ozalê bû. Li vê derê Hevserokê TUHAD-DERa Şirnexê Aydin Denîz anî ziman ku ew weke sazî dibêjin çavê malbat, heval, hogir û Rêberê Gelê Kurd Abdûllah Ocalan ronî be.
‘Heya Rêberê Gelê Kurd azad nebe têkoşîn berdewam e’
Parlementer Mehmet Zekî Îrmez jî diyar kir ku gelê Kurd weke her qadê li qada zindanan de jî gelek berxwedan pêk anî û wiha got: “Îro bi vê berxwedanê em gehiştine asteke dîrokî. Heya Rêberê Gelê Kurd Abdûllah Ocalan û hemû girtiyên me azad nebin, berxwedana me dê berdewam bike.”
‘Nîviya dilê min ma li pey dîwaran’
Mehmet Salih Erden ê piştî 30 salan di girtîgehê de hatiye ragirtin jî da zanîn ku derketina derve ya fîzîkî ji bo wî ne girîng e û ev tişt anî ziman: “Rast e îro ez li vir im lê nîvê dilê min li pişt dîwaran ma. Ji ber vê yekê heya ew hemû dernekevin, di welatek azad de bi Rêbertiya azad em jiyan nekin, em nikarin bêjin ev azadî ye. Heta hevalê me yê dawiyê û roja e azad nebe, têkoşîna me wê berdewam bike. Hemû keda me, xebatên me, têkoşîna me ji bo welat û roja azad e. Em nêzî rojên azad in, berdelên wê giran bûn lê azadî nêz e.”
Derbarê Mehmet Salih Erden de
Mehmet Salih Erden di sala 1995an li navçeya Hezex a Şirnex hat binçavkirin û piştre ji aliyê DGMê ve cezayê muebetê lê hate birîn. Erden 30 sal û 6 mehan bi dorê li Amed, Ordû, Sêrt, Erzirom, Oltû, Gumuşhaneyê hat ragirtin. Di 11ê çileya 2025an de cezayê xwe xelas kir lê ji aliyê Lijneya Rêveberiya Girtîgeha Xarpêtê ve berdana wî hatibû taloqkirin.
