Meclîsa Jinan a DEM Partiyê ya Amedê li dijî kuştinên jinan yên ku di demên dawî de ji aliyê mêran ve tên kirin daxuyanî da.
Partiya Wekhevî û Demokrasiyê ya Gelan (DEM Partî) a Amedê ji bo balê bikişîne ser komkujiyên li ser jinan ku her diçe zêde dibe daxuyaniyek da çapameniyê. Daxuyanî li Dîclekentê ya navçeya Peyasê ya Amedê hat dayîn. Parlamentera DEM Partiyê ya Amedê Sevîlay Çelenk, hevşaredar û nûnerên gelek saziyên jinan tevî daxûyaniyê bûn. Di daxuyaniyê de pankarta ‘Jinên tên qetilkirin serdema raperîna me ne’ û ‘Rêxistinbûn xweparastina me ye’ hatin hilgirtin û bênavber dirûşmeya ‘Jin Jiyan Azadî’ hat berzkirin.
Hevseroka DEM Partiyê ya Amedê Gulşen Ozer beriya daxuyaniyê axaftineke kurt kir û got: “Ji bo civakeke demokratîk me dixwest em îro li vir bicivin, lê îro em ji bo kuştina jinan careke din li hev civiyan. Em ji bo li dijî van komkujiyan dengê xwe bilind bikin û civaka azad ava bikin hatin cem hev. Em dizanin ku ev qetlîmên jinan polîtîk in. Jinên ku li dijî van kiryaran radibin ji aliye mêran ve tên kuştin.”
Daxuyaniyê bi dirûşmeya “Jin, jiyan, azadî” dest pê kir. Daxuyaniya çapemeniyê li ser navê jinan ji aliyê Berdevka Meclîsa Jinan a DEM Partiyê ya Amedê Gulîz Kaya ve hat xwendin.
’30 jinan bi gumanbarî jiyana xwe ji dest da’
Gulîz Kaya da xuyakirin ku di encama polîtîkayên bêcezahiştinê de kuştina jinan zêde bûye û wiha axifî: “Di meha Tîrmehê de 31 jin hatin kuştin û 30 jinan bi gumanbarî jiyana xwe ji dest da. Ev rewş ne tiştekî ku tenê bi şîdeta mêran bê vegotin e. Her roj jinek ji ber ku hevberdanê dixwaze tê kuştin, ji ber ku dibêje na, ji ber ku dixwaze bijî tê kuştin. Ev cînayet ne îzole ne; yekser di bin berpirsyariya dewletê, mekanîzmaya edaletê, saziyên hiqûqê û medyayê de pêk tên. Êrişên li ser maf û destkeftiyên jinan yên ji aliyê desthilatdariya siyasî ve, rêziknameyên yasayî yên ku dixwazin jinan di malbatê de heps bikin, axaftinên Diyanetê yên li ser cil û bergên jinan û êrişên li ser bedena jinan şerê li dijî jinan e.”
‘Polîtîkayên şerê taybet zirarê dide pêvajoyê’
Gulîz Kaya di berdewamiya daxuyaniyê de wiha got: “Di serdemeke wisa hêja de ku pêvajoya aştî û civaka demokratîk tê nîqaşkirin, êrişên li ser jinan, maf û destkeftiyên jinan û pêkanîna polîtîkayên şerê taybet zirarê dide pêvajoyê.”
Parlamentera Amedê Sevîlay Çelenk jî bal kişand ser sedema zêdebûna kuştina jinan di salên dawî de û got, “Şîdet her roj nêzî me dibe. Ev demeke dirêj e şîdeta li hemberî jinê ji sînorên toleransê derbas bûye.” Sevîlay Çelenk bal kişand ser pêvajoya Aştî û Civaka Demokratîk û bal kişand ser pêwîstiya pêşîgirtina li kuştina jinan.
Daxuyanî bi dirûşmeyên “Jin jiyan azadî” bi dawî bû.
