Derûnnas û nivîskar Brahîm Alûcî, bi e-pirtûka xwe ya nû ya bi navê “Gotinên Derûnkolerî” ku di nav Weşanxaneya Çandnameyê de derket, ronahiyê dide ser derûniya mirovê bindest û mekanîzmayên dagirkirina hiş.
Derûnnas Brahîm Alûcî ku berê jî gelek e-pirtûkên li ser medyaya dîjîtal belav kiribû û her wiha di nava Weşanên Belkiyê de pirtûka bi navê “Xezîneya Çanda Kurdî – Gotinên Pêşiyan” weşandibû, vê carê bi berhemeke taybet a di warê derûnkoleriyê de li pêşiya xwendevanan e.
Ji sedan aforîzmayên li ser derûniya bindestan pêk tê
E-pirtûka nû ya Alûcî ji sedan aforîzmayên ku balê dikişînin ser derûniya mirovê bindest û ji du beşên sereke pêk tê:
Beşa Yekem: Aforîzmayên ku bi peyva “Ajoyên jiyanê” dest pê dikin û li gorî alfabeya kurdî hatine rêzkirin dihewîne.
Beşa Duyem: Ferhengokeke ji têgihên derûnkoleriyê yên wekî ego, îd û derhişî pêk tê.
Nivîskar bi vê şêwaza xwe ya aforîzmayî armanc dike ku xwendevan di warê derûnkoleriyê de xwendinê bi “pêlên hêdî” di hişê xwe de hîs bikin.
Ziman wekî ‘Mala Mirovan’ tê pênasekirin
Di berhemê de, Alûcî navên derûnnasên navdar ên wekî Freud, Lacan, Winnicott û Fanon digire dest û wan ji bo analîzkirina civak û zimanê kurdî bi kar tîne. Li gorî pirtûkê, ziman “mala mirovan e” û dûrketina ji ziman, di heman demê de dûrketina ji xwebûnê ye.
Her wiha nivîskar bindestiyê tenê weke rewşeke siyasî nagire dest; berevajî vê yekê, dagirkirina hişî û trawmaya ku di nava bêdengiyê de dimîne hûr dike û dihone.
Di heman demê de derûnînasiyê ne tenê weke qadeke tenduristiyê, lê belê wekî kiryareke siyasî û derûnî ya berxwedanê pênase dike. Bi vê perspektîfê re, berhem di hişê xwendevanan de rê li ber lêpirsînên nû û kûr vedike.
Ji bo kesên eleqedar, dikarin e-pirtûkê li ser sepana înternetê peyda bike.
