2yemîn Kongreya Derûnasiyê ya Mezopotamyayê bi dirûşma “Mirov divê derûniya xwe bi ziman û nasnameya xwe hîs bike” ya ku dê 3 rojan berdewam bike di roja yekem de bi rûniştin û kargehan berdewam kir.
2yemîn Kongreya Derûniyê ya Mezopotamyayê ku ji aliyê Komeleya Derûnasên Mezopotamyayê (DER-MEZ) ve bi dirûşma “Mirov divê derûniya we bi ziman û nasnameya xwe hîs bike” tê organîzekirin û dê 3 rojan bidome, li Navenda Kongreyê ya Elî Emîrî ya Şaredariya Bajarê Mezin a Amedê dest pê kir. Di kongreyê de ku zêdetirî 50 axivêrên ji çar parçeyên Kurdistanê, dîaspora û bajêrên cûda yên Tirkiyeyê aniye cem hev, bi panel û komxebatên cûda dê bên lidarxistin. Di eywana kongreyê de pankarta “Derûnaniya mirov bi zimanê wî hêsan e” hat daliqandin. Gelek derûnas, siyasetmedar, endam û nunerên saziyên sivîl yên civakî û gelek kes tevlî kongreyê bûn.
Di Kongreyê de rûniştina duyemîn bi sernavê “Di pratîkên derunasiyê de ceribandin û terapi” berdewam kir. Runiştina duyemîn bi moderatoriya Berçem bi tevlîbuna derunas Emel Îzgî Demîr, Newroz Xebat Yildirim, Îsmaîl Guven dom kir.
Panelîstan di axaftinên xwe de bal kişandin li ser zimanê zikmakî û di pratîkên derunasiyê de ceribandin û terapî çawa pêk tê û li ser xebatên xwe yên bi mijarê ve girêdayî axivîn. Axivêran dan zanîn ku ji bo zarokên Kurd Kurdî ne tenê zimanek e û ew rêya girêdana wan a bi malbat, çand û nasnameya wan e. Di rûniştinê de bal kişandin li ser parastina zimanê dayîkê û wiha hat gotin: “Zimanê dayîkê dikare piştgiriyê bide xweşbûna derûnî û pêşveçûna hestiyarî.”
Piştî rûniştina duyemîn bi sernava “Di avakirin û înkarkirina nasnameyê de rola zimanê dayîkê” rûniştina sêyêmîn bi moderatoriya Ruken Esen berdewam kir. Panelîstên rûniştina sêyemîn Azad Dildar Gundercî, Masum Aydin û Aryen Aslan li ser rola zimanê dayîkê ya di avakirin û înkarkirina nasnameyan de rawestiyan.
Azad Dildar Guvencî di axaftina xwe de li ser perwerdeya zimanê dayîkê û di pêşeroja zarokan de feydeyên du zimanan çawa xwe dide nîşandan û ji bo nasnameyek baş derkeve holê berdewamiyek xurt çawa hewceye sekinî û da zanîn ku ji bo zimanê dayîkê aîdiyetek hewceye û ev aidiyet jî divê bi kom, civak û kesan ve bê nasîn.
Di berdewamiya rûniştinê de Masum Aydin jî li ser heman mijarê rawestiya û diyar kir ku zimanê dayîkê ne tenê zimaneke, ziman bingehek e û civakê dide nasîn. Masum Aydin li ser têkiliya ziman û mêjî de rawestiya û pêşkeşiya ku amadekiribû nîşanda û rûniştina sêyemîn bi pirs û bersivan bi dawî bû.
Piştî rûniştinan komxebata bi sernavê “Avakirina nasnameyê bi rêya tevger û lîstinê” pêk hat û roja yekemîn de bi vî awayî bi dawî bû.
Kongre dê sibê saet 10:0an de dîsa bi rûniştin û komxebatan berdewam bike.
