Koma Xebatgeha Hunerên Dikê ya Dîcleyê li eywaneke zanîngehê promiyera lîstika xwe ya bi navê “Provaya Aştiyê” kir û bal kişand ser zehmetiyên pêkhatina aştiyê.
Koma Xebatgeha Hunerên Dikê ya Dîcleyê (DÎSSA) di sala 2022yan de li Zanîngeha Dîcleyê hatiye avakirin û bi şanoya Kurdî derdikeve pêşberî xwendekaran îşev bi lîstika “Aştî” ya nivîskar Yewnan Arîstophanes derket ser dikê û promiyera lîstika xwe kir. Lîstik bi alîkariya lîstikvanan ji aliyê yek ji lîstikvanê lîstikê Kadîr Gur ve wergêrî Kurdî hatiye kirin. Lîstika ku gelek kes beşdar bûn li eywana şanoyê ya Rektoriya Zanîngehê hate lîstin.
Kedkarên DÎSSAyê beriya ku lîstik bê lîstin diyar kirin ku xwestin lîstika xwe li Navenda Kongreyê ya Zanîngehê bilîzin lê rayedaran destûr nedaye wan û diyar kirin ku li ser vê yekê tevî astengkirinê biryar dane li vê eywanê lîstika xwe bilîzin.
Beşdaran dema lîstik dihate lîstin carnan keniyan carnan keyfxweşiya bi lêdana çepikan nîşandan û gelek kesan jî bi telefonan dîmen û wêne kişandin. Lîstikvanên ku ji lîstika “Aştiyê” ya Arîstophanes sûd wergirtin bi lîstika xwe ya ku navê wê kiribûn “Provaya Aştiyê” bal kişandin ser pêvajoya aştiyê ya heyî û zehmetiyên wê. Lîstikvanan di lîstika xwe aştî weke zarok nîşandan û bi vê yekê bal kişandin ser zehmetiyên pêkhatina aştiyê. Lîstikvanan her wiha di lîstikê de qala pirsgirêkên bingehîn ên li welat diqewimin kirin û peyam dan ku serdest nahêlin aştî pêk bê û ji bo pêkhatina aştiyê bedel tên dayîn.
Lîstik ji aliyê beşdaran ve gelek hat ecibandin û lîstik bi pirs û bersivan bi dawî bû. Lîstik dê sibê û du sibe li heman eywanê saet di 19.00an de bê lîstin.
