Endamê Meclisa Nûneran ê Partiya Komarê Joe Wilson diyar kir ku Meclisa Nûneran a Amerîkayê yekem car alîkariyên leşkerî yên didin Iraqê bi şertê bêbandorkirina komên girêdayî Îranê ve girêda. Wilson diyar kir ku rêveberiya Trump bi awayekî micid li ser vê mijarê disekine û heta Iraq êrişên hêzên girêdayî Îranê yên li ser Kurdistanê ranewestîne û wan bêbandor neke dê alîkariyên leşkerî negire.
Têkiliyên Iraq û Amerîkayê bi boneya komên girêdayî Îranê bi qeyranek nû re rû bi rû ne. Di demên dawî de nûnerên Amerîkayê peyamên tund didin Iraqê û dixwazin li hemberî komên girêdayî Îranê tedbîran bigirin. Bi taybetî piştî êrîşên li ser qada neftê ya Hormorê ya Kurdistanê ev hişyarî derketine asta gefan. Herî dawî Endamê Meclisa Nûneran a Amerîkayê Joe Wîlsan daxuyaniyek têkildarî helwesta Meclisê li ser hesaba xwe ya Xê parve kir.
‘Êdî helwesta Iraqê nayê qebûlkirin’
Wîlson diyar kir ku bi salan e Iraq çavê xwe li van koman digire û êdî ev helwest nayê qebûlkirin. Wîlson ev tişt gotin: “Ez Nûnerê Trump ê Iraqê Mark Savaya pîroz dikim. Herî dawî bi zelalî ji Iraqê xwest êdî dest gotinan berde û di pratîkê de gavên şênber bavêje. Yekem car e di Zagona Rayekirina Ewlehiya Neteweyî ya Amerîqayê de alîkariyên leşkerî bi şertê helwesta Iraqê ve hate girêdan. Ku Iraq li hemberî gendêlî, êriş û kirinên komên girêdayî Îranê gav neavêje dê tu alîkariyên leşkerî neyên kirin.”
Koordînasyona Çerçeveyê hedef nîşan da
Têkildarî polîtîkayên Amerîkaqê yên berê de jî Wîlson rêveberiya Bîden rexne kir û anî ziman ku bi salan e komên girêdayî Îranê yên wekî Asaîb Ehl-î Heq, Kataîbî Hîzbûllah, Kataîb Iamma Alî û Bedîr bi alîkariyên Amerîqa dide artêşa Iraqê tên fînansekirin.” Wîlson balkişand ser aliyê siyasî yê van hêzên leşkerî jî û wiha got: “Koordînasyon Çerçevesî jî baneya van koman a siyasî ye. Niha li Parlementoya Iraqê xwedî hêz û bi temamî di bin bandora Îranê de ye. Qasî hêzên leşkerî hebin ji xwe kîjan partî qezenç bike jî fayde nake.”
‘Divê hêzên girêdayî Îranê bên belavkirin’
Wîlson bi bîrxist ku komên girêdayî Îranê ji Banqeya Navendî ya Iraqê, ji Wezareta Neftê û ji bûtçeya Iraqê ya navendî pere digirin û wiha domand: “Heta ev butçe neyê qutkirin divê alîkariya Amerîqayê ya leşkerî bê rawestandin.” Wîlson hikûmeta Irqaê jî rexne kir û wiha pê de çû: “Divê hikûmeta Iraqê li şûna ji dûvikên Îranê telîmat bigire li gorî berjewendiyên gelê xwe biryar bide.”
‘Rêz ji Hikûmeta Kurdistanê re bigirin’
Di berdawama daxuyaniya xwe de Wîlson bal kişand ser êrîşên li dijî Herêma Kurdistanê û xwest ku rêz ji Herêma Kurdistanê re bê girtin. Wîlson ev hişyarî kirin: “Pêwist e dûvikên Îranê êdî êrişî Kurdistanê nekin. Divê Hikûmta Iraqê destûr nede vê yekî û wan teşfîq neke ku Iraq dest ji hevgiriya bi Îranê re bernede nikare bibe welatekî serwer. Dema xilaskirina Iraqê ji Îranê hat.”
