DEM Partiyê li Wanê berî kongreya giştî ya ku dê di meha îlonê de bê lidarxistin konferansa herêma Serhedê li darxist. Latîf Çetîn di axaftina xwe de behsa girîngiya guhetinê kir û wiha got: “Em jî dixwazin bi vê kongreyê di siyaseta demokratîk de, di warê hişmendî, tarz û şêwazê de guhertin û veguhertinê pêk bînin.”
DEM Partî beriya kongreya xwe ya giştî ya ku dê di meha Îlonê de bê lidarxistin, li herêman konferansan li dar dixe. Di vê çerçovê de bi şiara ‘Ji bo komara demokratîk civaka azad û rêxistinkirî’ li eywana Tahîr Elçî ya Baroya Wanê konferansa herêma Serhedê hat lidarxistin. Hevserokên DEM Partî û DBPê yên bajêr û navçeyên Wanê, Hevşaredarên Şaredariyên DEM Partiyê yên herêma Serhedê, Parlementerên DEM Partiyê yên herêma Serhedê, aktivîstên TJAyê, endamên meclisan ên şaredariyên DEM Partiyê yên herêma Serhedê, Endamên meclisa ciwanan a DEM Partiyê û endam û rêveberên saziyên civakî tev li konferansê bûn. Piştî hilbijartina dîvanê, ji bo cangoriyên di têkoşîna demokrasiyê de jiyan xwe ji dest dane deqeyek rêzgirtin pêk hat. Piştî rêzgirtinê beşdaran dirûşma ‘Bijî Serok Apo’ berz kir.
‘Perspektîf komara demokratîk e’
Piştî rêzgirtinê endamê MYKa DEM Partiyê Latîf Çetîn axaftina destpêkê kir. Latîf Çetîn di axaftina xwe de bal kişand ser armanca konferansê û wiha got: “Em di pêvajoyeke dîrokî de derbas dibin. Di navbera Rêber Apo û dewletê de hevdîtin berdewam dikin. Li ser qanûnan nîqaş berdewam dikin. Rêber Apo derbarê kongreya DEM Partiyê de jî nêrînên xwe gotibûn û gotibû ez dixwazim kongreyê pêk bînim. Lê di aliyekî de jî tecrîd li ser Serok Apo tê meşandin. Em ê li benda perspektîfa Serok bin. Lê perspektîfa giştî jî komara demokratîk e.”
‘Divê em rêya çareseriyê deynin holê’
Latîf Çetîn di berdewamiya axaftina xwe de behsa nûbûnê kir û ev yek gotin: “Di pêvajoya Aşitî Civaka Demokratîk de Serokatî behsa nûbûn, xwe guhertin û veguhertinê kir. Em jî dixwazin bi vê Kongreyê di siyaseta demokratîk de di warê hişmendî, tarz û şêwazê de guhertin û veguhertinê pêk bînin. Hişmendiya demokratî ya xwecihî xurtir bikin. Ji bo vê jî em hemû berpirsyar in. Di van konferansan de jî divê em hemû bi awayekî wêrek kêmasiyên xwe tespît bikin, rêya derbaskirina van pirsgirêk û kêmasiyan nîqaş bikin, çaresariyê deynin holê. Divê her heval di van mijaran de bi awayekî wêrek nirxandin û pêşniyarên xwe bike.”
Konferansê piştî axaftina destpêkê ji çapemaniyê re girtî berdewam kir.
