DEM Partiyê, li ser Xê bi hashtaga “#SilahlarYakıldıYasaNerede (Çek hatin şewitandin, qanûn li ku ye?)” da destpêkirin. Ev kampanya di salvegera merasîma çekşewitandina PKKê de hat birêvebirin û balê dikişîne ser bêdengî û gavneavêtina dewletê.
DEM Partiyê bi wesîleya salvegera merasîma çekşewitandinê, li ser medya dîjîtal hashtaga “#SilahlarYakıldıYasaNerede (Çek hatin şewitandin, qanûn li ku ye?)” da destpêkirin. Siyasetmedar, rewşenbîr, parêzvanên mafên mirovan û gelek welatî tevli vê kampanyayê bûn û pirsa “Çek bêdeng bûn, ji aliyê PKKê gelek gav hatin avêtin, lê dewlet çima gavan navêje?” dikin.
PKKê tam salek berê, li ser biryara xwefesixkirinê li ber çavên dinyayê çekên xwe bi şewitandinê îmha kiribû. Ev gava ku gelek derdoran weke nayê kirin didît, di demeke kurt de pêk hat û rûpeleke nû di dîroka polîtîk de vekir.
Lê belê, tevî ku salek bi ser vê gava radîkal û dîrokî re derbas bûye jî, saziyên dewletê û îradeya siyasî ya Tirkiyeyê heta niha tu gavên berbiçav û qanûnî neavêtine û polîtîkayek bêhelwestî didome.
‘Bêqanûn aştî nabe’
Di daxuyaniyan û parvekirinên li ser medyaya dîjîtal de hat destnîşankirin ku mînakên li cîhanê nîşan didin ku bêyî ewlehiya qanûnî, aştiyeke mayînde pêkan nîn e. Ji bo ku şîdet careke din venegere, bang li Meclîsa Tirkiyeyê hat kirin ku berpirsiyariya xwe ya dîrokî bîne cih.
Daxwazên bingehîn ên ku di kampanyayê de derketin pêş, ev in: “Pêwîst e qanûneke taybet a ku pêvajoya bêçekbûnê ya sala borî dest pê kiriye di nav xwe de bihewîne, tavilê were derxistin. Ji bo vegera li siyaseta demokratîk, divê mîsogeriya hiqûqî were avakirin. Ji bo zêdekirina baweriya civakî, divê yasayên demokratîk bikevin meriyetê. Pêvajo divê bi mekanizmayên zelal, beşdar û berpirsiyar were meşandin. Beşdarên kampanyayê diyar kirin ku aştî nayê taloqkirin û nabe ku bibe qurbana berjewendiyên kesane û polîtîk. Hat destnîşankirin ku misogeriya aştiyeke rûmetdar û mayînde, zemînekî demokratîk û hiqûqî ye ku îradeya gel esas digire.
