Rêxistinên DBPê û DEM Partiyê ji bo piştgiriya pêngava Platforma Şiyar Be ya “Rabin” daxuyanî dan. Hevserokê DBPê yê Amedê Ahmet Dogan bang li gel kir ku ji bo ciwanan ji qirêjiyê xelas bikin tev li Platforma Şiyar Be bibin. Hevseroka DEM Partiyê ya Amedê Gulşen Ozer jî destnîşan kir ku ji bo ciwanan ji tiryak û fihûşê xelas bikin divê dest bidin destê hev û ciwanan ji rêya xerab xelas bikin.
Rêxistinên Partiya Heremên Demokratîk (DBP) û Partiya Demokrasî û Wekheviya Gelan (DEM Partî) ên Amedê li ber avahiya DEM Partiyê ya Amedê ji bo piştgiriya pêngava Platforma Şiyar Be! ya “Rabin” daxuyanî da çapemeniyê. Hevserokên DBPê yên Amedê Rûçem Vefa Elyakût û Ahmet Dogan, Hevseroka DEM Partiyê ya Amedê Gulşen Ozer, endam û rêveberên DEM Partiyê û DBPê tev li daxuyaniyê bûn.
‘Em zarokên xwe ji nav vî qirêjiyê derxin’
Ahmet Dogan diyar kir ku ji sala 2000î vir ve, li Rojhilata Navîn şerekî fîzîkî ji hêla hêzên hegemonîk ve tê meşandin û wiha got: “Di sala 2015-16an de jî li Kurdistanê, bi taybetî li bakurê Kurdistanê, hem bi êrîşa qeyiman hem jî bi êrişa fizîkî li ser partiya me, li ser gelê me şerekî dijwar hat meşandin. Lê belê, şerê herî dijwar, şerê ku em bi taybet nav dikin, li ser gelê me, li ser civaka me hat meşandin. Ji ber vê yekê me jî weke partî, sazî û dezgeh bi navê Şiyar Be, platformek ava kir. Li dijî tiryakê, fihûşê, çetetiyê me platformek bi vî rengî ava kir. Platforma ku hatiye sazkirin, ev nêzî du salan e xebatên xwe bi serkeftî dimeşîne. Di nav gel de jî bi erênî, bertekên baş em digirin. Weke partî jî em ê di nav vê platformê de xebatên xwe di asta herî mezin de bi gelê xwe re bidin meşandin. Em ê ciwanên xwe, keç û xortên xwe ji nav vê qirêjiyê rizgar bikin. Ji ber vê yekê, lazim e ku hemû gelê me di vî warî de şiyar be. Ji bo ku em zarokên xwe ji nav vê qirêjiyê derxin, ji vê pergala qirêj derxin, hemû gelê xwe vedixwînin nav vê platformê û têkoşîna li hember vê qirêjiyê em bidin meşandin.”
‘Werin em dest bidin destê hev û ciwanên xwe rizgar bikin’
Gulşen Ozer jî bangawaziya têkoşîna hevpar a li dijî polîtîkayên şerê taybet kir û ev tişt gotin: “Ji salên 1990î û vir ve polîtîkayên şerê taybet her tim bi rûyekî cuda derdikevin pêşberî me. Di salên 1990î de piştî cînayetên kiryarên nediyar, pişt re sîxurkirin, pişt re jî bi rêya hişbir û fihûşê lîstikên qirêj ên ku li ser ciwanên Kurd û gelê Kurd tên lîstin, em li qadan, li parkan û di bêçaretiya nav malbatan de dibînin. Wekî ku tê bîra we Platforma Şiyar Be berî çend rojan bi deklarasyonekê got ‘Êdî Şiyar bibin’. Ji bo em zarokên xwe ji fihûş û hişbirê rizgar bikin, werin em weke gel dest bidin destê hev. Mîna têkoşîna ku Kurd bi sedsalan e didin, em jî îro ciwanên xwe û paşeroja xwe rizgar bikin. Weke partiyên siyasî em li vir in, li gel wan in û piştgiriyê didin wan. Em bang li tevahiya gel dikin, werin em dest bidin destê hev û paşeroja xwe û ciwanên xwe ji vê riya xirab rizgar bikin. Paşeroj di tarîtiyê de nayê meşandin. Ez bawer dikim ku her kes dê berpirsyariyê bigire ser xwe. Em ê vê têkoşînê bi hev re bi ser bixin.”
