Şirnex – Nazdar Ataman û Hatîce Dûrmûş ên ku zarokên wan di 2021an de li herêma Garê di êrişa çekên kîmyewî de jiyana xwe ji dest dane, xwestin ku êdî xwîn bisekine û aştiyeke binecih pêk bê.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” li raya giştî kir. Dû re PKKê Kongreya xwe ya 12emîn li dar xist û biryar da ku xwe fesix bike. Malbatên cangoriyên ku di şer de jiyana xwe ji dest dan, piştgiriya banga Abdullah Ocalan û biryara PKKê dikin.
Di navbera 10-14ê Sibata 2021an de Kamûran Ataman (Şoreş Beytuşşebap) û Ergîn Dûrmûş (Bawer Elkê) di nav de 14 endamên HPGê li herêma Garê ya Herêma Kurdistana Federe di êrîşa bi çekên kîmyewî ya dewleta Tirk de jiyana xwe ji dest dan. Kamûran Ataman di sala 2004an de li navçeya Elkê ya Şirnexê tev li PKKê dibe û di sibata 2021an de li herêma Garê jiyana xwe ji dest dide. Ergîn Dûrmûş jî di 17ê Tîrmeha 2017an de tev li PKKê dibe û ew jî di sibata 2021an de jiyana xwe ji dest dide. Dayika Kamûran Ataman, Nazdar Ataman û dayika Ergîn Dûrmûş, Hatîce Dûrmûş behsa zarokên xwe kirin û li ser pêvajoya heyî axivîn.
‘Şoreş ji bo doza xwe fedaî bû’
Nazdar Ataman qala zarokatiya kurê xwe kir û wiha got: “Şoreş gelekî ji vê doza kurditiyê hez dikir. Şoreş ji bo vê doza xwe gelek fedaî bû. Şoreş xwendekar bû, dema lîse dixwend, payîz bû ew û du hevalên xwe tev li hevalan bû. Şoreş gelek ji vê dozê hez dikir û ji dil bû, bi eşq bû. Em pê serbillind in. Ji bo doza xwe, şeref û namusa xwe û axa xwe çûbû. Beriya ku biçe her tim behsa partiyê dikir. Gelek caran digot ez ê tev li hevalan bibim.” Nazdar Ataman da zanîn ku dema kurê wê û hevalên xwe bi çekên kîmyewî jiyana xwe ji dest dan ji televizyonê bihîstin.
‘Em gelek hez dikin ku ev xwîn bisekine’
Nazdar Ataman diyar kir ku ji pêvajoya ku Rêberê Gelê Kurd daye destpêkirin gelek keyfxweş in û wiha domand: “Em gelekî hez dikin ev xwîn bisekine. Êdî bila dilê çu dayikên din neêşe. Dayikên polîsan bin yên eskera bin ferq nake em dayik hemû wek hev in. Em êdî hez nakin dilê çu dayikan bisoje. Ev pêvajoya Serokatî daye destpêkirin bila bi cih were. Heta vê gavê jî dewleta tirk hêj çu gav neavêtine. Em hez dikin ev dinya aram be, deriye hefs û zindanan vebe û dilê tu dayikan neêşe. Em dixwazin aramî çêbibe ku em biçin ser gora lawên xwe. Em dixwazin axa wan bibînin. Em gelek dixwazin ku aştî çêbibe.”
‘Em dixwazin Serokê xwe di nava xwe de bibînin’
Nazdar Ataman xwest ku dewlet gaveke baş biavêje ku dinya aram be û ev tişt gotin: “Bila ev bi cih were. Em dixwazin aştiyeke binecih çêbibe ku em jê pişt rast bin. Em dixwazin Serokê xwe, zarokên xwe di nava xwe de bibînin. Ji bo herkesî bibe xweşî bibe berfirehî êdî bes xwîn birije. Bes dilê dayikan bisoje. Daxwaza me ev e.”
‘Em naxwazin ku dilê tu dayikan biêşe’
Hatîce Dûrmûş jî bi lêv kir ku kurê wê mirovekî gelek birehm û edalet bû û wiha got: “Eşqa partiyê wisa di dilî de bû nedizanî ka ev dinya çawa tê û diçe. Eşqeke bêhesab di dilê wî de bû.” Hatîce Dûrmûş da zanîn ku ji televizyonê hîn bûn ku kurê wî û hevalên wî jiyana xwe ji dest dane. Hatîce Ataman destnîşan kir ku naxwazin dilê tu dayikan bişewite û xwest ku aştiyek pêk were ku herkes azad bibe.
