Amed – Xemê Ete ya ku di têkoşîna azadiyê ya gelê Kurd de 3 zarokên wê canê xwe ji dest dane li ser pêvajoya heyî axivî û gavneavêtina dewletê rexne kir. Xemê Ete xwest aştiyeke baş çêbibe û got: “Divê ewil Serokê me azad bibe, hepsiyên me bên berdan.”
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Piştî banga dîrokî ya Abdullah Ocalan Partiya Karkerên Kurdistanê (PKK) jî di 5-7ê Gulanê de kongeraya xwe ya 12emîn pêk anî û biryara xwefexiskirinê ragihand. Dû re Koma Aştî û Civaka Demokratîk ku ji 30 gerîlayan pêk dihat di 11ê Tîrmehê de li Şikefta Casenê ya li Silêmaniya merasîmeke dîrokî li dar xist û li wir çekên xwe îmha kirin. Herî dawî jî Rêveberiya Tevgera Azadiyê ya Kurd ji bo silametiya pêvajoya heyî di 26ê Cotmehê de li Qendîlê daxuyanî da û ragihand ku wan hêzên xwe ji Bakurê Kurdistanê û Tirkiyeyê vekişandine. Tevî ku Rêberê Gelê Kurd Abdullah Ocalan û Tevgera Azadiyê ya Kurd ev gav avêtin jî hêj dewletê tu gav ne avêtine. Gelê Kurd û gelek beşên civakê ji ber gavneavêtina dewletê ji pêvajoyê bifikar in û dixwazin dewlet gavên şênber biavêje ku pêvajo bi aştiyeke mayînde encam bigire.
Sê xwişk û bira dan peye hev
Yek ji malbatên ku dixwazin pêvajo bi aştiyeke mayînde encam bigire jî malbata Ete ya ji Sêrtê ye ku niha li Taxa Yenîkoyê ya Bismilê rûdinê. Sê zarokên malbata Ete di têkoşîna azadiyê ya gelê Kurd de jiyana xwe ji dest dane. Muhsîne Ete (Sema Koçer) di sala 2005an de li Sêrtê tev li PKKê dibe û di 5ê Tebaxa 2009an de li herêma Kato Marûnis a navçeya Elkê ya Şirnexê bi hevalekî xwe re di kemînekê de jiyana xwe ji dest dide. Hesen Ete (Koçer Rûstem) yê ji şehadetê xwişka xwe bi bandor dibe di sala 2010an de tev li PKKê dibe û di 21ê Cotmeha 2014an de di şerê li dijî DAIŞê de li Şengalê jiyana xwe ji dest dide. Sûltan Ete (Sila Tolhildan) jî di sala 2014an de li Botanê tev li PKKê dibe û di 22yê Mijdara 2022yan de li herêma Zapê ya Başûrê Kurdistanê jiyana xwe ji dest dide. Navenda Ragihandin û Çapemeniyê ya HPGê di 22yê Cotmehê de ragihandibû ku Sûltan Ete jiyana xwe ji dest daye.
‘Em divên lihevhatinek çêbibe’
Dayika sê cangoriyan Xemê Ete têkildarî pêvajoya “Aştî û Civaka Demokratîk” axivî û gavneavêtina dewletê rexne kir. Xemê Ete xwest ku aştiyeke baş pêk were û wiha got: “Em divên lihevhatinek çêbibe. Bila derê hefs û zindanan bê vekirin, Serokê me azad bibe. Em dixwazin Serokê xwe bibînin û weke gelê Kurd bibin xwedî maf. Em naxwazin ne dayikên leşkeran ne jî dayikên Kurdan bigirîn.”
‘Êşa me êşa hemû gelê Kurd e’
Xemê Ete diyar ku her sê zarokên wan ji bo meseleya Kurd çareser bibe canê xwe dan û wiha domand: “Êşa me êşa hemû gelê Kurd e. Sê zarokên min çûne bila qurbana Kurdistanê bin. Em pê serbilind û serfiraz in. Zarokên me berê xwe dane wê rêya paqij.”
‘Divê dewlet jî gavekê biavêje’
Xemê Ete bal kişand ser gavên ku Tevgera Azadiyê ya Kurd avêtine û wiha pê de çû: “Gerîla ji bo lihevhatinê, aştiyê, Serokatiyê çekên xwe şewitandin û rabûn hêzên xwe ji Tirkiyeyê vekişandin. Divê dewlet jî gavekê biavêje lê hêj neavêtiye. Em hêvî dikin ku dewlet gavekê biavêje û xweşî, aştî û azadî çêbibe. Bila ne dayikên leşkeran ne dayikên gerîlayan ne jî dayikên hepiyan bigirîn.”
‘Em dixwazin Serokê me were nav me’
Xemê Ete got ku “Em dixwazin Serokê me were nava me, em wî bibînin” û ev yek anî ziman: “Divê dewlet ewilî gavekê ji bo Serokatiyê biavêje. Ji bo hepsiyan, lihevhatinê biavêje. Lê heta niha dewletê hê jî tu tişt nekiriye. Divê ewil Serokê me azad bibe, hepsiyên me bên berdan û dinya xweş bibe. Heke gav neyên avêtin wê pêvajo nemeşe.”
