Endama Meclîsa Dayîkên Aştiyê Hediye Dûman li Midyadê hat definkirin.
Endama Meclîsa Dayîkên Aştiyê Hediye Dûman ku duh li Stenbol jiyana xwe ji dest da, li gundê Kêferzê yê navçeya Midyadê ya Mêrdînê hat definkirin. Endamên Meclîsa Dayîkên Aştiya, endamên û rêveberên MEBYA-DERê, partiyên siyasî û saziyê civakî yên demokratîk, parlamenterên DEM Partî Salîha Aydenîz, Kamûran Tanhan û gelek welatî beşdarî merasimê bûn. Piştî wecîbeyên olî Hediye Dûman bi gotina “Oxir be dayîka legenhan, oxir be dayîka şehîdan” hat definkirin. Piştî definkirina Hediye Dûman dûa hatin xwendin û piştre axaftin hatin kirin.
Her tim aştî dixwest
Berdevka Meclîsa Dayîkên Aştiya ya Mêrdînê Turkan Dûrç got ku Hediye Dûman her dixwest aştî pêk were û wiha axivî: “Ew ji sala 1992an pêde dayîka aştiyê bû. Ji bo aştiyê were deverek nema ku lê negeriyayî. Heya îro her tim aştî dixwest. Di têkoşîna Tevgera Azadiyê de zarokek xwe winda kir, her dixwest keça xwe bibîne lê çênebû. Bila êdî aştî were vê axê û dayîk û zarok bigehin hev. Serê me hemûyan sax be, cihê wê bihuşt be.”
Parlementera DEM Partiyê Salîha Aydenîz baş kişand ser têkoşîna Hediye Dûman û ev tişt gotin: “Dayîka Hediye Dûman emrê xwe di ber aştiyê de derbas kirin. Îro Rêberê gelan ji bo aştiyê hevdîtinan dike.Ev pêvajo bi saya têkoşîna dayîkên weke Hediye Dûman gihiştiye merheleyekî. Ji îro pêde em ê barê Dayîka Hediye Dûman hildin ser milê xwe û ji bo aştiyê têkoşîn bidin.”
Xizma Hediye Dûman, Emîne Dûman jî got ku têkoşîna Hediye Dûman ji bo herkesî bû û ji îro şûn ve ew ê ji bo serkeftina aştiyê berxwedana xwe bidomînin.
Piştî axaftinan girse çû cihê şînê ku li navenda Midyadê ji bo Hediye Dûman hatiye danîn.
