Parêzerê Pexşan Ezîzî ragihand ku rayedarên dadgeha rejîma Îranê dubare darizandina Pexşan Ezîzî red kirine û got: “Jiyana Pexşan Ezîzî di bin metirsiyê de ye.”
Parêzerê girtiya siyasî ya Kurd Pexşan Ezîzî, Emîr Reîsiyan li ser hesabê xwe yê Xê têkildarî cezayê darvekirina miwekîla xwe ku hat erêkirin, agahiyên nû belav kir.
Emîr Reîsiyan ragihand ku liqa nehem a Dadgeha Bilind a Îranê dubare darizandina girtiya siyasî Pexşan Ezîzî ya li Girtîgeha Evînê tê girtin, red kir.
Parêzer Reîsiyan destnîşan kir ku jiyana Pexşan Ezîzî di bin metirsiya darvekirinê de ye û got: “Em ê li ser biryar û pêvajoya dadgehkirinê, nerazîbûn nîşanî vê biryara redkirinê bidin. Ji ber ku ev biryar xelet e.”
Rojnameger û aktîvîsta Kurd Pexşan Ezîzî di 4ê Tebaxa 2023yan de li Tehranê hatibû binçavkirin. Di 11ê Kanûna 2023yan de jî bi îdiaya “Li dijî hikûmeta Îranê xebatên çekdariyê kiriye” hate girtin. Dadgeha Şoreşê ya Tehranê jî di 23yê Tîrmeha 2024an de bi heman îdiayê cezayê darvekirinê da Pexşan Ezîzî. Konseya Darazê ya Bilind a Îranê jî di 8ê Çileya 2025an de cezayê darvekirinê erê kir.
Nerazîbûnên rêxistinên jinan û parêzvanên mafê mirovan li dijî erêkirina cezayê darvekirinê yê li girtiya siyasî ya Kurd Pexşan Ezîzî ji aliyê Îranê ve hatiye birîn, her diçe zêdetir dibe. Lê hîna metirsiya darvekirinê li ser Pexşan Ezîzî berdewam dike.
