Dadgeha Bilind di doza mirina Muhammed (7) û Furkan Yildirim (6) ên birayê hev de biryara beraetê ya derbarê polîsan de xira kir.
Li taxa Karşiyaka ya navçeya Silopya ya Şirnexê di 3ê gulana 2017an de dema Muhhamed Yildirim û birayê wî Fûrkan Yildirim li mala xwe di xew de bûn erebeya polîsan a zîrxî ketibû gundirê malê û herdu zarokan jiyana xwe ji dest dabû. Doza ku malbatê vekirî û dadgehên herêmê biryar dayî ji aliyê Dadgeha Bilind ve hat xirakirin. Dadgeha Bilind biryara cezayê li ajokarê maşîneya zirxî Omer Yîgît hatiye birîn û biryara beraetê ya derbarê Midurê Emniyetê Mûrat Maden de hatiye dayîn xira kir.
‘Kujer ê ji nû ve werin darizandin’
Dadgeha Bilind biryara beraetê ya derbarê Mûrat Maden bi yek dengî xirakir û xwest Mûrat Maden careke din were darizandin. Dadgeha Bilind di biyara xwe de diyar kir ku Mûrat Maden biryara peywirdarkirina maşîneya zirxî daye û li ser vê yekê ev bûyer pêk hatiye. Her wiha Dadgeha Bilind da zanîn ku li gel ku mafê Omer Yîgît ê ajotina maşîneya zîrxî tuneye jî Mûrad Maden ew şandiye peywirê û ji ber vê yekê di qewimîna buyerê de ew jî berpirsyar e. Danişîna ji nû ve darizandina Mûrat Maden ê 20ê Cotmeha 2026an were lidarxistin.
‘Ev doz ê ji bo dozên din jî bibe mînak’
Parêzerê malbata Yildirim, Rojhat Dîlsîz derbarê biryara Dadgeha Bilind de diyar kir ku ji destpêka dozê heya îro em heman tiştê dibêjin lê dadgehên herêmê biryarên çewt didan û wiha axivi: “Ji destpêka dozê heya îro me digot divê her kesê ku berpirsyar e were darizandin. Lê tenê ajokarê maşîneya zirxî ceza kirin. Di encamê de Dadheha Bilind jî got kesê ajokar peywirdar kirine jî divê werin darizandin û cezakirin. Ev doz dê ji bo hemû dozên meşîneyên zirxî yên zerar dayîne welatiyan bibe mînak. Ji ber ku di van dozan de tenê ajokar nikare were darizandin. Divê hemû kesên peywirdar werin cezakirin.”
Çi qewimîbû?
Li taxa Karşiyaka ya navçeya Silopya ya Şirnexê di 3yê Gulana 2017an de dema birayên bi navê Muhhamed û Fûrkan Yildirim li mala xwe raketibûn, wesayîta zirxî ya nobedariya avahiya rêxistina MHPê ya Silopya digirt bi ser mala herdu zarokan de qelibî û di encamê de Muhhamed û Furkan Yildirim jiyana xwe ji dest da. Piştî bûyerê malbata Yildirim derbarê polîs û kesên di bûyerê de bûne sedema mirina zarokên wan doz vekirin û di encama darizandinê de di 19ê Hezîrana 2019an de derbarê ajokarê maşîneya zirxî Omer Yîgît de biryara 2 sal û mehek ceza hat dayîn. Her wiha darbarê amîrê polîsan Mûrat Maden de jî biryara beraetê hat dayîn.
Li ser biryara dadgehên herîmê parêzerê malbata Yildirim, Rojhat Dîlsîz doz birine Dadgeha Bilind û Dadgeha Bilind hemû biryarên dadgehên herêmî dane xira kir. Omer Yîgît û Mûrat Maden ên ku bûne sedema mirina herdu zarokan ê ji nû ve werin darizandin.
