Ciwanên enternasyonalîst li Amedê li dijî êrişên ser Rojava daxuyanî dan û gotin: “Gelê Rojava ji bo parastina ax û şoreşa xwe, xwe bi rêxistin dike û em jî li kêleka wan disekinin.”
Ciwanên enternasyonalîst yên ji Almanyayê bi boneya piştgiriya berxwedana çalakiyên ji bo Rojavayê Kurdistanê hatin Bakurê Kurdistanê û bi ciwanên welatparêz re daxuyanî dan çapemeniyê. Daxuyanî li ber avahiya DEM Partiya Amedê bi İngilîzî û Kurdî hate xwendin. Metna Îngîlîz Lea Hobbiebrunken xwend û metna bi zaravayê Kurmancî jî endama Meclîsa DEM Partiyê Berfîn Erdemîr xwend.
Ciwanan dowîzên ku Îngîlîzî û Kurdî li serê “Ciwan ji bo Rojava dibin yek.” “Ciwan Nobedarê Şoreşa Rojava ne” navîsandibûn rakirin.
‘Em ji bo beşdariya çalakiyên ciwanan hatin’
Berfîn Erdemîr di destpêka daxuyaniyê de da zanîn ku ciwanên enternasyonalîst ji bo beşdarbûna çalakiyên Bakur û piştgiriyê bidine gelê Rojava hatine û got: “Em wekî ciwanên enternasyonalîst ên ji rêxistinên cuda yên ciwanan yên Almanyayê, ji bo diyarkirina hevgirtina xwe ya bi berxwedana Rojava re, wekî heyetekê hatin Amedê. Em li vir in da ku beşdarî çalakiyên ciwanan ên li Bakur bibin. Di 6ê Çileyê de, HTŞê li dijî herêmên xwerêveberiyê yên Helebê êrişeke nû û mezin da destpêkirin. Ev êriş, nîşaneya destpêka êrişeke berfireh e ku li ser asta navneteweyî hatiye plankirin û Rêveberiya Xweser a Demokratîk a Bakur û Rojhilatê Sûriyeyê hedef digire. Ji wê rojê ve, mîlîsên cîhadîst ên ku ji aliyê Tirkiyeyê ve tên fînansekirin, êrişî gelê Bakur û Rojhilatê Sûriyeyê dikin û bi hezaran çeteyên DAIŞê ji zindanan berdan.”
‘Êriş bi plana dewletên cîhanê tên kirin’
Berfîn Erdemîr diyar kir kû rewşa niha li Rojava têde berpirsyariya hemû dewletên cîhanê ye û ev yek li dijî gelê Kurd plana qirkirinê ye û wiha axivî: “Niha mîlîsên cîhadîst û artêşa Tirk Kobanê dorpeç kirine û ber bi herêma Cizîrê ve pêşde diçin. Rewşa mirovî ya li van herêman her ku diçe felaketbûrtir dibe. Li Kobanê gel nikare bigihîje av, elektrîk û xurekê. Şevê din herî kêm pênc zarokan jiyana xwe ji dest dan. Tişta ku em li vir şahidiyê jê re dikin, ne tenê kampanyayeke wêrankirinê ye ku ji aliyê çeteyên cîhadîst an dewleta Tirk ve tê meşandin, ev hewldaneke navneteweyî ye ku armanca wê tunekirina xwerêveberiya demokratîk û destkeftiyên wê ye. Rêveberên li herêma Rojhilata Navîn, Dewletên Yekbûyî yên Amerîkayê û Ewropa bi dehan salan e ku ji bo serdestiya îdeolojîk û nûfûza li herêmê têdikoşin. Bi dehan salan e, welatên Rojava û bi taybetî DYA, hewl didin ku hêz û bandora xwe ya li herêmê zêde bikin. Ji bo rêyên bazirganiyê yên kurtir, çavkaniyan an jî dersînorkirinên hêsantir, ew amade ne ku li ser cesedan re derbas bibin. Hemû hikûmetên Rojavayî ji komkujiyên ku niha li herêma xwerêveberiyê ya Bakur û Rojhilatê Sûriyeyê tên kirin, berpirsiyar in. Almanya jî di nav de ye.”
‘Em azadiya fîzîkî ya Rêber Apo daxwaz dikin’
Berfîn Erdemîr di dawiya daxuyaniyê de bal kişand ser azadiya fizîkî ya Rêberê Gelê Kurd Abdullah Ocalan û da zanîn kû parastina Rojava parastina fikra sosyalîzmê û paradîgmaya Rêberê Gelê Kurde û wiha got: “Enternasyonalîzma ku bingeha têkoşîna jiyana azad a li seranserê cîhanê ye, ne tenê dirûşmek e pratîkek e ku divê em berpirsiyariya wê bigirin ser milê xwe. Wekî ciwanên ji Almanyayê hatine, em parastina xwe û rêxistinkirina demokratîk wekî berpirsiyariya xwe dibînin. Rojava, şoreşa serdema me ye ku li hemberî pergala kapîtalîst a kedxwar û nemirovî alternatîfekê pêşkêş dike. Îro tişta ku divê em li Rojava biparêzin ne tenê herêmek e. Di heman demê de parastina fikra sosyalîzmê û paradîgmaya Rêber Apo ye, ku em wî bi taybetî ji bo azadiya gelan wekî mînak dibînin. Em wekî heyetekê, azadiya fîzîkî ya Rêber Apo talep dikin. Mafê beşdariya bêsînor a di vê pêvajoyê de, ji bo serkeftina pêvajoyê neçarî ye û berxwedan bilind dibe! Gelê Rojava ji bo parastina axa xwe û şoreşê xwe birêxistin dike em jî li kêleka wan disekinin. Ev rewş, careke din ji me ciwanên demokratîk re nîşan dide ku: Yekane hêza ku dikare li hemberî şeran bisekine û aştiyê pêkan bike, enternasyonalîzma ji jêr ve û hevgirtina ku em bi hev re ava dikin e. Em ê vê peyamê ji Ewropayê bibin Rojava. Ti sînor nikarin me bidin sekinandin! Bijî Berxwedana Rojava! Bijî hevgirtina enternasyonal!”
