Faîl Sabrî Can ku di sala 2021an de li navçeya Qoserê ya Mêrdînê Cahîde Can a ku pê re zewicî bû qetilkiribû, cezayê muebbeta giran lê hatibû dayîn. Ceza ji aliyê Dadgeha Bilind ve hat erêkirin.
Li navçeya Qosera Mêrdînê di 10ê kanûna 2021an de faîl Sabrî Can, jina ku pê re zewicîbû Cahîde Can bi çekê qetilkiribû. Cezayê muebbeta giran ku dabûn faîl, hat erêkirin. Faîlê ku li 4emîn Dadgeha Cezayê Giran a Mêrdînê dihat darizandin, di dema darizandinê de beyanên dûrî rastiyê da. Li ser vê yekê dadgehê ji bo diyarkirina rewşa wî ya cezayî ji Saziya Tibê ya Adlî (ATK) rapor xwest. Di rapora ku hat amadekirin de hat diyarkirin ku di dîroka bûyerê de ehliyeta cezayî ya faîl Sabrî Can tam e. Faîlê ku di dema darizandinê de îdia kir ku bûyer nayê bîra wî û daxwaza daxistina ‘tehrîqa neheq’ kir lê parastina faîl ji aliyê dadgehê ve nehat qebûlkirin. Dadgehê ji ber sûcê ‘qetilkirina jinê’ cezayê muebbeta giran Sabrî Can birî. Faîl her wiha ji ber sûcê hilgirtin û bikaranîna çekên bêmolet jî bi salek cezayê girtîgehê hat cezakirin. Dadgehê derbarê faîl de daxistina takdirî jî pêkneanî.
Ceza teqez bû
Li ser temyîzkirina biryarê, Daireya 1emîn a Cezayê ya Dadgeha Bilind li ser dosyeyê lêkolîn kir. Daîreyê rapora Saziya Tibê ya Edlî ya ehliyeta cezayî ya faîl Sabrî Can di dîroka bûyerê de, bes dît. Daîreyê helwesta faîl a piştî bûyerê ku dadgeha herêmî girtibû, berçavan girt û biryar da ku nekaranîna daxistina takdirî ne dijî hiqûqê ye. Daîreya 1emîn a Cezayê ya Dadgeha Bilind, cezayê muebbeta giran dabûn faîl Sabrî Can bi yekdengî erê kir. Bi vê re cezayê ku ji bo qetilkirina Cahîde Can hatibû danîn, teqez bû.
