Stenbol – Cigirê Serokkomar Cevdet Yilmaz ku di serdana Sirri Sureyya Onder de axivî anî ziman ku Sirri Sureyya Onder bandoreke pir erênî li pêvajoyê kir û got ku dê pêvajo ji niha şûn ve jî bêrawestan berdewam dike.
Endamê Şandeya Partiya Wekhevî û Demokrasiyê ya Gelan (DEM Partî) Sirri Sureyya Onder ku qirîza dil derbas kir 2 roj in li nexweşxaneyeke taybet a Stenbolê tê dermankirin. Sirri Sureyya Onder ji dûh vê di beşa lêneherîna awarte de ye û rewşa wî ya xeternek berdewam dike. Hevserokên Giştî yên DEM Partiyê Tulay Hatîmogullari û Tuncer Bakirhan û gelek parlamenterên DEM Partiyê jî li nexweşxaneyê ne.
Îro Cigirê Serokkomar Cevdet Yilmaz jî li nexweşxaneyê serdana Sirri Sureyya Onder kir. Cevdet Yilmaz li nexweşxaneyê bi bijîşk, hevserokên giştî yên DEM Partiyê û keça Sirri Sureyya Onder, Ceren Onder Kandemir re hevdîtin kir û derbarê rewşa Sirri Sureyya Onder de agahî girtin. Cevdet Yılmaz piştî serdanê li ber nexweşxaneyê daxuyaniyeke kurt da.
‘Em bi bawer in ku Sirri Beg dê ji vê rewşê xilas bibe’
Cevdet Yilmaz anî ziman ku wan derbarê rewşa tendûristiya Sirri Sureyya Onder de agahiyên baş girtine û wiha got: “Sirri beg siyasetmedarekî ku ji aliyê mirovî ve li mirovan dinere û bi hemû derdoran re di têkiliyê de ye. Em berxwedana wî dizanin û bi bawerin wê ji vê rewşe de xilas bibe. Em bi hevî ne di demekî nêz de baş bibe û em jî duayan dikin. Bijîşk jî çi ji destê wan tên dikin.” Cevdet Yilmaz li ser pirsa wê pêvajo çawa bandor bibe jî wiha got: “Sirri beg bi helwest û sekna xwe ji pêvajoya aştiyê re tiştên erenî derxistin holê. Lê ew pêvajo bi ser kesan re ye û îradeyeke siyasî ye. Di pêvajoya aştiyê de dê tu astengî û sekinandin nebin û wê berdewam bike.” Cevdet Yilmaz ji pirsa “Serokkomar Erdogan wê were nexweşxaneyê an na?” re jî ev bersiv da: “Min silavên Serokkomar anîn. Lê ez nizanim dê were vir an neyê. Lê Serokkomarê me rewşê ji nêz vê dişopîne.”
