Cenazeyê Dayika Aştiyê Sakîne Arat ku yek ji dayikên pêşengeke têkoşîna aştiyê û edaletê bû, bi girseyî hat veşartin. Dayikên Aştiyê di merasîmê de axivîn û gotin: “Dayika Sakîne her tim hêviya me ya aştiyê xurt dikir.”
Dayika Aştiyê Sakîne Arat ya ku demeke dirêj bû di nav tekoşîna aştiyê û edaletê de bû, duh li Amedê jiyana xwe ji dest dabû. Ji bo cenazeyê Sakîne Arat li Goristana Yenîkoyê ya Amedê merasîm hat lidarxistin. Dayikên Aştiyê yên ji gelek bajaran, Hevseroka Giştî ya Partiya Herêmên Demokratîk (DBP) Çîgdem Kiliçgun Uçar, parlamenterên Partiya Wekhevî û Demokrasiyê ya Gelan (DEM Partî), nûnerên partiyên siyasî yên bajar û rêxistinên civaka sivîl jî di nav de bi hezaran kes tev li merasîma definkirinê bûn. Li ser wesiyeta wê cenazeyê wê li Goristana Yenikoyê hate veşartin. Dayikên Aştiyê ku tev li merasîmê bûn hevxemên êşa malbata Arat û li pey cenazeyê wê hêsir barandin. Dayikek Aştiyê jî li ser dayika Sakîne lorand.
‘Ew hesret di dilê wê de ma’
Piştî wecîbeyên olî, Dayikên Aştiyê darbesta Sakîne Arat ji mizgefta goristanê hilgirtin ser milên xwe û bi dirûşma “Şehîd namirin” anîn ser gorê. Dayika Aştiyê Nûbiyet Demîr di merasîma veşartina cenaze de axivî û got: “Daxwaza dayika Sakîne her tim aştî bû. Ji bo aştiyê têkoşiya. Ew hesret di dilê wê de ma. Dilê me şewitî, bila dilê tu dayikên din neşewitin. Oxira te ya xêrê be, oxira xêrê be.”
‘Xwezî ev hesret di dilê wê de nemaya’
Dayika Aştiyê Nezahat Teke jî axivî û wiha got: “Belê em ê hemû rojekî bimirin, lê xweziya çavên wê vekirî neçûya, wê her tim aştî dixwest. Her digot dilê min şewitî lê bila dilê tu dayikeke din neşewite. Destê dayika Sakîne yê aştiyê li hewa ma, em destên wê maçî dikin. Wê em sêwî hiştin, lê em ê têkoşîna wê bidomînin. Serê malbata wê, serê me û gelê Kurd sax be.”
Piştî axaftinan cenazeyê dayika Sakîne hat veşartin.
Dê şîna ji bo dayika Sakîne li Mala Şînê ya Odabaşi Bal a li Qada Newrozê were danîn.
