Hevseroka Komeleya Wêjekarên Kurd helbestvan Fatma Tunç diyar kir ku her çiqas eleqeya xwîneran ji bo pirtûkên Kurdî hebe jî lê mîna salên bere xwîner ji ber rewşa aborî nikarin pirtûkan bistînin.
Komeleya Wêjekarên Kurd jî standa xwe li 8emîn Fuara Pirtûkan a Amedê daniye û kon vedaye. Cihê wê standa wêjekaran ne li beşa weşanxaneyan e. Li beşa komeleyan û saziyan cih digire. Li cihekî bêdeng e û ev beş zêde bala xwîneran nakişîne. Li ser standa komeleyê pirtûkên endamên komeleyê hene.
Bi xemla Dêrikî li ber standê ye
Dema ez li nava fuarê digeriyam bala min kişand û min dît jinek bi kitan ango girêdana cil û bergên Dêrika Çiyayê Mazî li ber standê ye û li benda xwîneran û kesekî ye ku serdana wan jî bike. Ev jina bi girêdana Dêrikê li ber standê ye helbestvan û Hevseroka Komeleya Wêjekarên Kurd Fatma Tunç ango Fatêxan e. Serê wê bi ser pirtûkekê de xwar kiribû û dixwend…
Dema min silav da Fatêxan pirr şanaz bû û çav û devê wê keniya. Mîna ku bêje, “Şikir va rojnamevanek serdana me kir.” Min xwest ez pê re hevpeyvînek bikim, bi kêfxweşî qebûl kir û em li ser pêşengeha pirtûkan axivîn.
Fatma Tunç bi bîr xist ku komeleya wan ev du sal in beşdarî fuarê dibe û got ku ew ne ji bo qezencekî beşdar dibin ew ji bo naskirina pirtûkên kurdî û wêjeya kurdî beşdar dibin.
Gazina ji bo cih
Fatma Tunç gilî û gazinên xwe yên ji bo veqetandina cih jî anî ziman û da zanîn ku komele û saziyan hemû xistine quncika dawî û got: “Ji ber meseleya cih kes nizane em li vir in. Divê ku qîmetek mezin bidana komeleya wêjekaran. Lê kes ewqas guh nadê. Cihê me xuya nake.”
‘Eleqe heye lê kes nikare pirtûkan bikire’
Fatma Tunç anî ziman ku gel ketiye rewşek wisa ku êdî nikare pirtûkan bikire û wiha li axaftina xwe zêde dike: “Rewşa gel ne ew rewş e ku pereyan veqetîne û bê pirtûkan bistîne. Hinek kes jî pereyê ji bo bazara xwe veqetandine, naçin bazarê tên vir û pirtûkan distînin. Gelek xwîner tên li standa dinêrin û derbas dibin diçin. Aboriyê bandorek neyînî li ser kirîna pirtûkan kiriye. Eleqeya xwîneran heye lê ji ber bihabûnê kes nikare pirtûkan bistîne. Gelek kes heqê rêya wan jî nîn e ku bên vir. Lê helbet em dibînin kesên tên li pirtûkê Kurdî dinêrin jî, em wê kêfxweşiyê di rûyê wan de dibînin.”
Xwendina helbestan
Fatma Tunç xemla xwe ya Dêrikî du helbest jî ji kameraya me re xwend. Fatma Tunç helbesta xwe ya bi navê “Kezî” û ji nav klasîkên Kurdî jî helbestek xwend.
