Hejmara 31an a Rojnameya Azadiya Welat bi manşeta ‘Deriyekî nû vedibe’ derket pêşberî xwînerên xwe.
Rojnameya Azadiya Welat di hejmara 31an de bal kişand ser Qanûna Çarçoveyî ku ji Komîsyona Dadê derbas bû û manşeta ‘Deriyekî nû vedibe’ derxist pêş. Rojnameyê gotara Rojnameger Mehmet Şahîn a balê dikişîne ser pêngava 15ê Tebaxê ku bû destpêka şerê çekdarî û heta îro, derxist pêş. Her wiha dîsa gotara Rojnameger Felemez Ulug ku balê dikişîne ser Qanûna Çarçoveyî ku hat rojevê û wekî deriyekî nû û gaveke nû pênase dike. Felemez vê qanûnê wekî ‘Qanûna Hevgirtina Civakî’ pênase dike û bi taybetî destnîşan dike ku ji bo gavên din bên avêtin rola çapemeniya azad û hêzên demokratîk gelek girîng e.
Rojnameyê di rûpeya Hevpeyvînê de jî cih da nirxandinên Hevserokê KONGRA GEL Remzî Kartal ên der barê qanûna ku hatiye rojeva meclisê û pêvajoyê.
Nivîskar Cahît Kirkazak jî bi sernavê ‘Gav bi gav ber bi Civaka Demokratîk ve’ balê dikişîne ser girîngiya vê Qanûnê û aliyê wê yên kêm. Rojnameyê dîsa di rûpela Jin de cih da gotara Nivîskar Mulkiye Bîrtane ya bi sernavê ‘Jin û Civakîkirina Aştiyê’, di rûpelên din de jî cih da gotara nivîskar Rifat Ronî ya bi sernavê ‘Ji bo mafê azad û wekhev’, gotara nivîskar Gelawêj Ewrîn a bi sernavê ‘Hunermendê Şoreşa Jin Jiyan Azadî’ û gotara nivîskar Adar Jiyan a bi sernavê ‘Jiyana Wêjeyê.’
