Stenbol – Amedspor duh piştî maça İdirsporê bû şampiyon û derket Super Lîgê. Serkeftina Amedsporê çi Bakur, Başûr, Rojava, Rojhilatê Kurdistanê û gelek navendên cîhanê bi coşeke mezin hate pîrozkirin. Ji zarokên kolanên Sûrê heta siyasetmendaran, ji jin û ciwanan heya kal û pîran şampiyontî bû coşeke neteweyî.
Dema di futbolê de tîmên ku piştgiriya wê gel dike werin gotin di serî de tîma Atletich Bilbao û Barcelona tê hişê mirov lê belê êdî tîmek din li van her du tîman zêde bû. Ev jî Amedspor e.
Atletich Bilbao: Tîma gelekê
Atletich Bilbao û Barcelona di La Lîgayê de cih digirin. Atletich Bilbao di sala 1898an de hatiye avakirin û gelê Baskê temsîl dike. Herêma Baskê li Îspanyayê herêmeke xweser e. Atletich Bilbao di tîma xwe de tenê cih dide kesên ku li Baskê hatine dinê. Bi vî awayî hem li ser navê Baskê hestiyariyekê çêdike hem jî dilsoziya xwe ya gelê Baskê dide jiyandin. Li cîhanê her serkeftineke Atletich Bilbaoyê navê gelê Baskê careke din tîne rojevê.
Bijî Barcelona bijî Katalanya
Barcelona jî tîma gelê Cataloniayê ye. Tîma Barcelonayê di sala 1899an de hatiye avakirin. Barcelone li tevahî cîhanê tê nasîn. Listîkvanên Barcelonayê herdem pirsgirêkên herêma Cataloniayê tînin ziman. Listîkvanê Barcelonayê dema dibin şampiyon, gotina ‘Visca Barca Visca Cataluña (Bijî Katalanya, bijî Barcelona) olan dide.
Dîroka navê Amedsporê
Amedspor jî ji avabûna xwe ya roja me ya îro ji hin qonaxên girîng derbas bû. Di sala 1972yan de Melîkahmet Tûranspor hate avakirin. Di sala 1985an de Melîkahmet Tûranspor navê xwe kir Melîkahmetspor. Piştre di sala 1990an de Melîkahmet navê xwe kir Diyarbakir Belediyespor. Diyarbakir Belediyespor di sala 1999an de navê xwe kir Diyarbakir Buyukşehîr Belediyesî DÎSKÎspor. Di sala 2010an de Diyarbakir Buyukşehîr Belediyesî DÎSKÎspor navê xwe kir Diyarbakir Buyukşehir Belediyespor. Herî dawî di sala 2015an de nav careke din hat guherandin û navê tîmê bû Amedspor. Piştî nav bû Amedspor di nava gelê Kurd de bêhtir hat nasîn û heskirin. Amedsporê pêvajoya derbasbûyî de rastî gelek êrîşên nijadperest hat, bi mehan deplesmanan bêyî aligir lîst, gelek ceza lê hat bîrin û serkeftina Amedsporê ji ber sedemên cuda hat astengkirin.
Coşa hemû Kurdan aniye ba hev
Îro li her devereke Kurdistanê coşa serkeftinê ya Amedsporê belav bûye. Amedspor di hefteya dawî ya Lîga 1emîn a Trendyolê ya TFFê de duh li deplesmanê İgdirsporê 3-3 ma û bi destxistina 1 puanê derket Super Lîgê. Piştî şampiyontiya Amedsporê, ji her çar aliyê Kurdistan û gelek navendên Tirkiye û cîhanê bi milyonan welatî daketin kolanan û serkeftina Amedsporê pîroz kirin û peyamên pişgiriyê dan. Îro gelê Kurd û dostên Kurdan bi serkeftina Amedsporê keyfxweş in û li dor derdora Amedsporê xelekeke piştevaniyê û hevgirtinê ava kirin. Ji kolan û gundên Amedê, heta gelek bajarên Kurdistanê ji 7 saliyê heta 70 saliyê welatî çavên wan li ekranên maçê bûn û bi serkeftinê daketin qadan û bi coşeke mezin serkeftina Amedsporê pîroz kirin.
Têkoşîna Super Lîgê
Amedspor di sezona pêşiya me de dê di Super Lîgê de cih bigire. Bi wî awayî gelek fersend li pêşiya Amedsporê hene. Amedspor jî wekî tîmên Atletich Bilbao û Barcelona dikarê navê gelê Kurd di qada sporê de bigihijîne tevahî cîhanê. Amedspor a bûye weke tîmeke neteweyî dê bi xwedîderketin û heskirina mîlyonan tevbigere û di qada sporê de cih û bandora xwe zêde bike. Di sezona pêş de di Super Lîgê de tîmen xurttir ên Tirkiyeyê dê bibin hevrikê Amedsporê. Herçiqas li hemberî Amedsporê zehmetî û astengî hebin jî sînerjiya ku bi milyonan kesî ava kiriye û piştgiriya gelê Kurd û dostên Kurdan dê her li pişt Amedsporê be.
