Amed – Di Festîvala Şanoyê ya Navneteweyî ya Amedê de wê komên şanoyê ji welatên mîna Ûkrayna, Rûsya, Îsraîl, Filistîn, Azerbaycan û Ermenîstanê werin ba hev, lîstikên xwe yên li dijî şer pêşkêş bikin û bi rêya hunerê peyama diyalogê bidin.
Şanoya Bajêr a Amedê, bi hevkariya Enstîtuya Şanoyê ya Navneteweyî (ITI Worldwide), cara yekem festîvaleke şanoyê ya navneteweyî li dar dixe. 11emîn Festîvala Şanoyê ya Navneteweyî ya Amedê di navbera 24ê Nîsanê û 2yê Gulana 2026an de bi temaya “Diyalog Ji bo Aştiyê” wê li Amedê bê lidarxistin.
Şanoger Yavuz Akkuzu têkildarî vê festîvala dê bê lidarxistin û amadekariya wê tê kirin ji Ajansa Welat re axivî.
Ev festîval ne tenê şahiyek e, hunera welatan e
Şanoger Yavuz Akkuzu diyar kir ku di pêvajoyeke ewqas girîng de wê li Amedê dest bi bernameyeke girîng bikin û got ku di festîvalê de wê komên şanoyê ji welatên mîna Ûkrayna, Rûsya, Îsraîl, Filistîn, Azerbaycan û Ermenîstanê werin ba hev, lîstikên xwe yên li dijî şer pêşkêş bikin û bi riya hunerê diyalogê ava bikin. Yavuz Akkuzu da zanîn ku mebesta wan ew e ku komên şano yên li welatên şer lê didome bînin cem hev û wiha got: “Em dixwazin dewletên di şer de ne, komên wan bînin Amedê û bi lîstikên dijî şer, peyameke mezin bidin. Şer tiştên neyînî derdixe holê, em aştiyê dixwazin. Em dixwazin Amed bibe navenda diyaloga aştiyê. Şanoya Kurdî jî wê di vê peyam û pêvajoyê de bi xwedî roleke sereke rabe.”
Ji bo Rojhilata Navîn û cîhanê peyama diyalogê
Akkuzu da zanîn ku her lîstik wê bi Kurdî, Îngilîzî û Tirkî bê nivîsandin da ku peyam bigihîje her kesî û ev yek anîn ziman: “Ev festîval ne tenê ji bo Amedê, lê ji bo Rojhilata Navîn û cîhanê peyameke hêvîdar e. Hunermend şer naxwazin, ew aştî dixwazin. Şanoya Kurdî wê di navenda vê diyalogê de be û Amed wê bibe navenda aştîyê ya hunerî.”
Piştgiriya navneteweyî
Seroka ITI Worldwide Dr. Jessica Atwooki Kaahwa û Marharyta Korniushchenko ji Ukraynayê jî beşdarî civînên amadehiyê bûn û piştgiriya xwe ragihandin. Civîna mezin a destpêkê li Berlînê hate kirin. Xebatên aborî yên festîvalê didomin. Armanc ew e ku dewlet û sponsor alîkariyê bikin. Heta niha name ji 20 welatan re hatine şandin û piraniya bersivan erênî bûn e. Ji zêdetirî 20 welatan dê komên şanoyê tev li festîvalê bibin. Heta niha 15 kom tevlibûna xwe ya festîvalê pejirandin e. Tê xwestin 20-25 kom amade bin. Atolye û panelên li dijî şer jî dê ji bo şagirt û ciwanan werin lidarxistin.
