Koçberên ji Efrînê diyar kirin ku piştî derketina bi neçarî ya ji Efrînê ev çend sal e di nava koçberiyê de ne û xwestin ku bi awayek bi ewle vegerin ser axa xwe.
Koçberên di encama dagirkeriya dewleta Tirk û êrişên komên girêdayî wê, bi neçarî axa terk kirine li gorî Peymana 29ê Çile li benda vegera Efrînê ne. Koçberên ku li dibistanên Kantona Cizîrê bi cih bûne, ji bo vegera li cih û warên xwe nêrînên xwe bi ajansa ANHAyê re parve kirin.
‘Em dixwazin vegerin ser axa xwe’
Fatme Sîdo diyar kir ku ew dixwazin bi selametî vegerin cih û warê xwe û wiha got: “Em dixwazin bi hêza xwe re vegerin ser axa xwe, ev çend sal e em dûrî warên xwe ne.”
‘Divê em bi hêza xwe re vegerin’
Emîne Hemze jî da zanîn ku ew dixwazin vegerin lê tirsa wan a ji rê û dema ku bigihêjin warê xwe û ewlehiyê nebînin heye. Emîne Hemze wiha got: “Ev bû 8 sal em koçber in, êdî rewşa me xerabtir dibe, em dixwazin vegerin warê xwe.”
‘Divê ewlehî bê misogerkirin’
Şikrî Mistefa destnîşan kir ku piştî derketina ji Efrînê heta niha ji cihekî ber bi cihekî din ve koçber dibin û wiha anî ziman: “Zarokên me bêxwendin mane, em bi neçarî ji cih û warê xwe derketin. Em dixwazin vegera me bi kêfxweşî û serbilindahî be, divê ewlehiya xelkê me bê misogerkirin.”
