Rêxistina Şopandina Mafên Mirovan a Navneteweyî (HRW) destnîşan kir ku kampa Holê bi awayekî nerêxistinkirî hat valakirin û çarenûsa 8 hezar û 500 kesî ne diyar e.
Rêxistina Şopandina Mafên Mirovan a Navneteweyî (Human Rights Watch-HRW) têkildarî kampa Holê piştî ku ji malbatên çeteyên DAIŞê hat valakirin, raporek weşand. HRWê agahî da ku piştî Hikumeta Demkî ya Sûriyeyê ragihand wê Kampa Holê vala kiriye, niha çarenûsa 8 hezar û 500 kesên ji malbatên çeteyên DAIŞê yên nediyar e. Heman rêxistinê diyar kir ku derketina malbatên çeteyên DAIŞê ji Kampa Holê bi awayek bêserûber pêk hatiye.
Banga ‘cihê kesên ji kampan derketine diyar bikin’
Piştî vekişiyana Hêzên Sûriya Demokratîk (HSD) komên Hikumeta Demkî ya Sûriyeyê derbasî Holê bibûn û di 30ê Çileyê de ragihandin dê kampê vala bikin. Di wê çarçoveyê de di 22yê Sibatê de ragihand ku Kampa Holê bi tevahî hatiye valakirin. Heyanî nîvê meha Çileyê li kampên Roj û Holê nêzî 28 hezar kes diman, ji wan 12 hezar û 500 biyanî bûn û 4 hezar kes jî Iraqî bûn. Her wiha HRWê ji rayedarên Hikumeta Demkî ya Sûriyeyê xwest nasnameya kesên ji kampê derketine diyar bike. HRWê di dawî de bang li hemû hikumetan kir ku zû têkevin tevgerê û welatiyên xwe vegerînin welatê wan.
