Xwendekarên Zanîngeha Dîcleyê di çarçoveya Roja Zimanê Zikmakî ya Cîhanê de bi daxuyaniyeke çapemeniyê bang rayedarên dewletê yên Tirkiyeyê kir ku statuya zimanê Kurdî bi awayekî fermî bê nasîn.
Xwendekarên Zanîngeha Dîcleyê bi minasebeta 21ê Sibatê Roja Zimanê Zikmakî ya Cîhanê li Fakulteya Perwerdehiyê daxuyanî dan çapemeniyê. Xwendekarên ku tev li daxuyaniyê bûn pankarta “Perwerdehiya bi zimanê dayîkê maf e divê ev were bicihanîn” vekirin.
‘Têkoşîn, ji bo zimanên din hêvî ye’
Xwendekara beşa Ziman û Wejeya Kurdî Sozda Yalûr metna daxuyaniyê xwend. Sozda Yalûr girîngiya 21ê Sibatê û dîroka têkoşîna Bengaliyan a ji bo ziman bi bîr xist û destnîşan kir ku ev têkoşîn ji bo zimanên din hêvî ye û rê nîşan dide. Sozda Yalûr di berdewama axaftina xwe de wiha got: “21ê Sibatê Roja Zimanê Zikmakî ya Cîhanê ji bo gel û neteweyên weke me gelek girîng e. Ev roj ji têkoşîna xwendekarên Bengalî ku ji bo zimanê xwe can dan hatiye afirandin.”
‘Heke xwendekar neparêzin kes nikare ziman biparêze’
Sozda Yalûr bi lêv kir ku Kurd jî mîna neteweyên din ji bo zimanê xwe têdikoşin û destnîşan kir ku hê jî statuyeke zimanê Kurdî tune ye. Sozda Yalûr wiha dirêjî da axaftina xwe: “Hê zimanê me ne fermî ye û ev yek nayê qebûl kirin. Heke em weke ciwan û xwendekar zimanê xwe neparêzin, tu kes dê neparêze û zimanê me dê ber bi windabûnê ve biçe.”
Xwendekaran daxwazên xwe rêz kirin
Sozda Yalûr daxwazên xwe yên ji dewleta Tirk wiha rêz kirin: “*Divê saetên dersên Kurdî ku li dibistanan da tên dayîn zêdetir bin û her wiha ne tenê ji bo xwendekarên dibistana navîn ji bo hemû zarokên me bên dayîn.
*Divê rêya zêdekirina prestîja Kurdî bê vekirin.
*Divê li qadên giştî û fermî de zimanê Kurdî were bikaranîn.
*Divê kontenjanên beşên Kurdî werin zêdekirin.
*Dawîya dawî jî divê statûya Kurdî bi awayekî fermî bê naskirin.”
Sozda Yalûrê di dawiya axaftina xwe de wiha got: “Divê em li dijî asîmîlasyonê bisekinin û zimanê xwe biparêzin. Heke em xwedî li zimanê xwe dernekevin, tu kes dê dernekeve. Ziman koka me û jiyana me ye.”
Çalakî bi dirûşmên “Bijî Zimanê Kurdî”, “Bijî Roja Zimanê Zikmakî” û “Bijî 21ê Sibatê” bi dawî bû.
