Parlamenterê DEM Partiyê Mehmet Zekî Îrmez li dijî danîna qeyûmên ser şaredariyan destnîşan kir ku desthilat bi danîn û polîtîkaya qeyûm aştiya civakî xera dike û got: “Em van polîtîkayên qirêj qebûl nakin. Bi vî awayî aştî pêk nayê.”
Şaxa Sendîkaya Genel-Îşê ya Şirnexê li dijî girtina hevşeredar û endamên meclisê ya Şeredariya Akdenîzê û danîna qeyûmê ser şaredariyê li qada Cumhuriyetê ya Şirnexê daxuyanî da. Rêveberên Partiya Herêmên Demokratîk (DBP), DEM Partî, CHP, endam û nûnerên saziyên sivîl ên Şirnexê, Parlamenterê DEM Partiyê yê Şirnexê Mehmet Zekî Îrmez û gelek kes tev li daxuyaniyê bûn. Di daxuyaniyê de pankarta “Ji bo aştiyeke civakî rêzê ji vîna gel re bigirin, ji qeyûm re na” hat vekirin. Di daxuyaniyê de dirûşmeya “Qeyûm talan e berxwedan jiyan e” hat berzkirin.
Metna daxuyaniyê ji aliyê Hevseroka Şaxa Genel-Îşa Şirnexê Siyajîn Buruntekin ve hat xwendin. Siyasjîn Buruntekîn bi lêv kir ku careke din vîna gel hatiye desteserkirin û wiha got: “Biryarên qeyûm li dijî hiqûqî ne û di wîcdana gel de jî hatiye mehkûmkirin. Armanca polîtikayên qeyûm ew e ku destkeftî û vîna Kurdan desteser bike û sepana qeyûm rewa bike. Qeyûm dijminê kedê ye. Qeyûm rant û talan e. Heke li dijî vê sepanê bertekên xûrt dernekevin wê berdewam bike. Me tu car rejîma qeyûm qebûl nekir û em ê ji niha şûn ve jî qebûl nekin, em ê hînî vê yekê nebin. Em careke din bang dikin ku dev ji desteserkirina vîna gel berdin. Hevşeredarên ku bi dengên gel hatine hilbijartin divê demildest vegerin ser karê xwe.”
‘Li aliyekî aştî û li aliyekî kuştin û qeyûm nabe’
Pistre Parlamenterê DEM Partî Mehmet Zekî Îrmez axivî. Mehmet Zekî Îrmez anî ziman ku desthilata AKP û MHPê careke din vîna gel desteser kiriye û wiha got: “Danîna qeyûman aştiya civakî xera dike. Ev cara sêyemîn e qeyûm datînin ser şaredariyên me. Lê gelê Kurd li dijî vê yekê her care dersek mezin da desthilatê. Ji niha şûn ve jî wê gelê Kurd li ber xwe bide û têkoşîna xwe berfirehtir bike. Di vê pêvajoya ku hêviyên gel mezin dibe, desthilatdarî dîsa peşkê lê dixe. Ji aliyekî ve dibêje, ‘ez ê pirsgireka Kurd çareser bikim’ ji aliyê din vê jî vîna gelê Kurd desteser dike. Ji aliyeki ve qala biratiyê dikin ji aliye din ve jî êrişî Kurdan dikin û sîvîlan dikujin. Em ê di aştî û azadiya gelê xwe de israr bikin. Bila desthilat dev jî van polîtikayan berde. Ji bo ev pêvajo bi ser bikeve, divê şeredariyên desteser kirine radestî gel bikin. Em di vê pevajoyê de samîmî ne û dixwazin aştiyeke bi rûmet pêk were. Em van polîtikayên qirêj qebûl nakin bi vî awayî aştî pêk nayê. Em ê heta dawiyê li ber xwe bidin û têkoşîna xwe mezin bikin.”
Piştî axaftinan 5 deqiqî çalakiya rûniştine hat lidarxistin.
