KCKê bi daxuyaniyekê Komploya Navneteweyî ya 15ê Sibatê bi tundî şermezar kir û daxuyand ku di encama bexwedana Rêberê Gelê Kurd Abdullah Ocalan û gelê Kurd de Komplo heta astekê vala hatiye derxistin. Di daxuyaniyê de Peymana 6ê Çile li dijî Rojavayê Kurdistanê pêk hatî jî wekî komployek navneteweyî ya nû hate pênasekirin û bang li gelê Kurd û gelên demokratîk ên cîhanê hate kirin ku li dijî van komploya heta azadiya fîzîkî ya Abdullah Ocalan û misogerkirina statûya Rojavayê Kurdistanê têkoşîn û berxwedan bê mezinkirin.
Hevserokatiya Konseya Rêveber a KCKê di salvegera 27emîn a komploya navneteweyî de bang li gelê Kurd û tevahiya gelên demokratîk ên cîhanê kir ku bi dirûşma “Azadî ji Rêber Apo re, statu ji Rojava re” têkoşînê mezin bikin. Di daxuyaniyê de hêzên beşdarî Komploya Navneteweyî bûyîn bi bi tundî hatin şermezarkirin û biryardariya têkoşîna ji bo azadiya Abdullah Ocalan re hate dubarekirin. Di daxuyaniyê de hate ragihandin ku Abdullah Ocalan bi raman û têkoşîna xwe ya bêhempa Kompllo vala derxistiye û balkişand ser van xalan: “Ji bo têkbirina komployê û xurtikrina tevgera me ya azadiyê li nava şert û mercên zindanê jî bi rola xwe rabû û zemîna mezinkirina têkoşînê xurt kir.”
‘Komplo li dijî demokratîkbûna Rojhilata Navîn pêk hat’
Di daxuyaniyê de çarçoveya berfireh a Komployê hate bibîrxistin û ev tişt hatin gotin: “Komploya navneteweyî li dijî porojeya Rojhilata Navîn a Demokratîk ku Rêber Apo xwest li ser bingeha azadiya gelê Kurd û xwişk-biratiya gelan biafirîne, pêk hat. Ji ber ku hêzên navneteweyî û herêmî dizaynek li ser qirkirina gelan avakiribû. Hêzên navneteweyî bi rêya hevkarên xwe Rojhilata Navîn kontrol dikirin. Rêber Ap bi paradîgmaya xwe ya ku xwe dispart çareriya pirsgirêka Kurd, xwişk û biratiya gelan, pergala ku xwe dispart hevkarî û nokeriya li Rojhilata Navîn bi dawî bike. Ji ber ku çareseriya pirsgirêka Kurd wê li Rojhilata Navîn rê li ber demokratîkbûnê vekiribûya. Lawazkirina hevkariyê û pêşîvekirina li demokratîkbûnê, dihat wateya şikestina lingên hêzên hegemon ên li herêmê. Hebûna pergala Rojhilata Navîn a xwe dispêre hevkarî û nokeriyê ji bo wan girîng bû. Ev komplo di heman demê de li dijî xeta azadiya jinê jî hate kirin ku di pêşvebirina demokrasî û azadiyê de weke havên û katalîzor e. Ji ber ku hêzên hegemonîk ên bi serweriya mêr, îdeolojiya rizgariya jinê ji bo sîstema xwe ya bi serweriya mêr weke metirsiyeke mezin didîtin. Bêguman şikandina bandora PKK’ê ya li nava Kurdan bi bandor e, yek ji armancên wan ên bingehîn bû.”
‘Ji paradîgmaya Rêber Apo ditirs in’
Têkildarî armancên Komployê jî hate daxuyandin ku hêzên hegemon bi bêbandorkirina Rêber Apo û tasfiyekirina Tevgera Azadiyê xwestine bigihin armancên xwe û wiha domandin: “Ji ber vê yekê jî gelek welat tevlî vê komployê kirin ku di dîrokê de mînakeke xwe nîne. Li dijî Rêber Apo êrişek welê xistin meriyetê ku li ser rûyê erdê nikaribe ji xwe re cihekî bibîne. Meşandina komployê bi vî rengî nîşan da ku ji fikir, îdeolojî û xeta polîtîk a Rêber Apo çiqasî ditirsin. Li dijî Komployê bi pêşengiya çalakiyên ‘Hûn nikarin roja me tarî bikin’ gelê me li her cihî rabû ser piyan. Li Bakur, Başûr, Rojava û Rojhilatê Kurdistanê gelê me li hemberî her cure zextan li ber xwe da. Gelê me yê li Ewropayê qet rûnenişt, li hemberî komployê di afirandina ruhê berxwedanê de bi roleke girîng rabû. Rêber Apo di nava mercên dîlgirtinê yên Îmraliyê de got, komployên dîrokî nikarin pêşketinan bisekinînin, lê bi lez dikin û mînaka herî mezin a berxwedana zindanê nîşan da. Rêber Apo bi berxwedana zindanê ya 27 salan hîn xurt bû, mezin bû, veguherî rêberê azadiyê yê jinan û tevahiya mirovahiyê. Sed sala 21emîn bi îdeolojiya rizgariyê ya Rêbertî re wê bibe sedsala azadî û demokrasiya mirovahiyê. Di afirandina vê sedsalê de wê têkoşîna azadiya jinê roleke pêşengiyê bilîze.”
‘Komplo di astek girîng de vala hate derxistin’
Di daxuyaniyê de hate destnîşankirin ku Komplo di asteke girîng de hatiye pûçkirin, lê belê bi temamî nehatiye têkbirin û wiha hate domandin: “Ji xwe piştî Peymana Parîsê ya di 5ê Çileya 2026an de hate kirin, êrişa 6ê Çileyê dest pê kir, bû komploya duyemîn a navneteweyî. Li cografiya ku komploya navneteweyî ya 1998an lê destpê kir, komplo hate nûkirin û êrişê destpê kir. Çawa ku komploya 15ê Sibata 1999an di şexsê Rêber Apo de êrişa ji bo qirkirina Kurdan bû, êrişa ku di 6ê Çileyê de hate destpêkirin jî êrişek li ser paradîgmaya Rêber Apo, sîstema demokratîk û destketiyên afirandî ye. Di heman demê de êrişek ji bo sabotekirina pêvajoya Aştî û Civaka Demokratîk e. Desthilatdariya demkî ya li Şamê û çeteyên ser bi wê ve bi piştgiriya hêzên navneteweyî û dewleta Tirk êriş birin ser Rojava û Bakur Rojhilatê Sûriyeyê û hewil dan sîstema demokratîk a ku bibe modela demokratîk a Rojhilata Navîn tasfiye bikin.”
‘Gelê Kurd komplo dît û rabû ser piyan’
Her wiha têkildarî raperîna gelê Kurd a li çar perçeyan û dîasporayê jî hate bi bîr xistin û ev xal hatin destnîşankirin: “Gelê Kurd dît ku ev komplo jî êrişek li ser hebûn, jiyana demokratîk û azad a Kurdan e, lewma li her cihî rabû ser piyan. Weke nerazîbûna sala 1999an a li hemberî Komployê, heman nerazîbûn di serhildanên xwedîderketina li Rojavayê Kurdistanê de jî hate nîşandan. Ev xwedîderketin di heman demê de xwedîderketina li paradîgmaya Rêber Apo û jiyana demokratîk û azad a gelê Kurd e. Xwedîderketina li destketiyan e ku bi têkoşîna bi dehan salan li çar parçeyên Kurdistanê hatin afirandin. Hate dîtin ku êriş di şexsê Rojava de li hemberî tevahiya gelê Kurd û destketiyan e. Xwedîderketina li Rojava xwedîderketina hîn berfireh a sala 1999an a li Rêber Apo û PKKê bû. Êriaş li ser Şêxmeqsûd, Eşrefiyê, Rojava û Bakur Rojhilatê Sûriyeyê komployek li ser demokratîkbûna Rojhilata Navîn û azadiya gelê Kurd e. Em gelê xwe û hêzên demokrasiyê yên li her parçeyên Kurdistanê li hemberî vê komployê rabû ser piyan, pîroz dikin. Divê bê zanîn ku komplo dewam dike û bi vê têgihiştinê ev xwedîderketin bê dewamkirin û armanca komployê bi temamî bê têkbirin.”
Daxuyanî bi banga rabûna li dijî Komploya Navneteweyî û komployên nû hate kirin û ji tevahiya gelê Kurd hate xwestin ku bi tevlêbûna, “Azadî ji Rêber Apo re, statu ji Rojava re” têkoşîn bê mezinkirin.
