Şandeya Îmraliyê ya DEM Partiyê piştî hevdîtina bi Serokê Giştî yê Partiya Pêşerojê Ahmet Davutoglû re daxuyanî da. Endamê şandeyê Sirri Sureyya Onder anî ziman ku di hevdîtinê de pêşniyar, rexne û hişyarî xwestine.
Parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder, piştî hevdîtina bi Rêberê PKK’ê Abdullah Ocalan re, li ser daxwaza Abdullah Ocalan serdana partiyên siyasî dikin. Parlamenter Pervîn Buldan, Onder û Hevşaredarê Bajarê Mezin ê Mêrdînê Ahmet Turk ku li şûna wî qeyûm hate tayînkirin, di çarçoveya serdanan de bi Serokê Giştî yê Partiya Pêşerojê Ahmet Davutoglû re hevdîtin kirin.
Sirri Sureya Onder, piştî hevdîtinê wiha got: “Me hinek qala tecrûbeyên xwe yên berê kir. Me di çarçoveya hevdîtinên nû de bi wan re agahî parve kirin. Me ji wan pêşniyar, rexne û hişyarî rica kir. Wan jî em bi berfirehî agahdar kirin. Em ê piştî hevdîtina bi Selahattîn Beg (Demîrtaş) re daxyaniyeke berfireh bidin.”
Ahmet Davûtoglu: Başkirin bi demokrasiyê dibe
Ahmet Davutoglû jî ji ber serdanê spasiya şandeyê kir û got: “Hevdîtineke pir dilgerm bû. Me qenaeta xwe parve kir. Divê ji tecrûbeyên berê ders bên girtin. Me got ku di demeke li seranserî cîhanê, herêmê, Sûriye, Iraq, Lubnan û Urdunê guherînên lezgîn çêdibin de me bal kişand ser girîngiya rewşa navxweyî. Başkirina rewşa navxweyî jî tenê bi demokrasiyê dibe. Ev jî bi perspektîfeke ku Kurd, Tirk û hemû hemwelatî bi hêvî li pêşerojê dinêrin pêkan e. Pêşniyara min ew e ku hem endamên şandeyê, hem jî hemû siyasî ew e ku li hemberî vê pêvajoyê, ji bo avakirina aştiya Tirkiyeyê tevbigerin.”
Rojnamegeran, nirxandinên Hevseroka Giştî ya DEM Partiyê Tulay Hatîmogûllari ya têkildarî Xezeyê pirsîn. Sirri Sureya Onder jî got: “Ev daxuyanî hate berevajîkirin. Nêzikatiya me ya giştî ne bi karesatê, bi aştiyê dikare bê pênasekirin. Aştî ne tiştekî hêsan e lê tişta herî xweş e. Em rica dikin ku kesek van gotinan berevajî neke.”
