Daîreya Têkiliyên Derve ya Herêma Bakur û Rojhilatê Sûriyeyê diyar kir ku ew pabendbûna xwe bi parastin û bêalîbûna saziyên NY ji bûyerên li qada Sûriyeyê destnîşan dike, da ku rola wan a mirovî û bêalî di xizmetkirina hemû welatiyan de bê îstîsna berdewam bike.
Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê têkildarî xwepêşandana di 11ˊê Çileyê de li bajarê Qamişloyê li ber avahiya Komîseriya Bilind a Penaberan a Neteweyên Yekbûyî (NY) pêk hatiye, daxuyaniyek da.
Di daxuyaniyê de wiha hate gotin: “Di 11ê Çileya 2026an de, li bajarê Qamişlo xwepêşandanek li ber avahiya Komîseriya Bilind ê Penaberan ê Neteweyên Yekbûyî (UNHCR) hat lidarxistin, ku tê de hejmarek ciwanên hêrsbûyî beşdar bûn da ku komkujî û binpêkirinên mafên mirovan ên ku di van demên dawî de li dijî şêniyên Şêxmeqsûd, Eşrefiye, Benî Zeyd û Suryan, hatine kirin, şermezar bikin.
Dîmenên tirsnak û zêdebûna gotinên nefretê li ser platformên medyaya civakî û hin kanalên fermî yên medyayê hin beşdaran han dan ku tevlî reftarên bêberpirsiyar bibin, di nav de nivîsandina daxuyaniyên ku bi rewş û rola vê saziya navneteweyî re ne lihevhatî ne, ku rêxistineke mirovî ya bêalî ye ku xizmetên xwe di sektorên cûda de li Herêma Bakur û Rojhilatê Sûriyeyê peyda dike.
Rêveberiya Xweser a Herêma Bakur û Rojhilatê Sûriyeyê vê mijarê rasterast bi rayedarên ajansên Neteweyên Yekbûyî yên li Qamişlo re dişopîne û li gorî qanûnên navneteweyî û prensîbên Rêveberiya Xweser ji bo kontrolkirina wê xebitiye. Di vê çarçoveyê de, em ji nû ve pabendbûna xwe ya tevahî ji bo parastina saziyên NY û misogerkirina bêalîbûna wan di şerê Sûriyeyê de ji nû ve piştrast dikin, bi vî rengî berdewama rola wan a mirovî û bêalî di xizmetkirina hemû welatiyan de bê îstîsna garantî dikin.”
