Li Rihayê welatiyê bi navê Ramazan Başkale jiyana xwe ji dest daye û li ser hemû hewldanan rêveberiya girtîgehê bi hinceta, “ewlehiyê” destûr neda girtiya siyasî Avşîn Esma Başkale biçe şîna bavê xwe.
Li navenda Rihayê di 3ê Çileyê de welatiyê bi navê Ramazan Başkale ji ber nexweşiya dil jiyana xwe ji dest da. Piştî cenezaeyê Ramazan Başkale hat definkirin malbatê li navenda Rihayê şîn danî. Keça Ramazan Başkale, Avşîn Esma Başkale ku 13 sal in di zindanê de ye û niha li Girtîgeha Tîpa T ya Hejmar 2 ya Rihayê dimîne, piştî ku bihîst bavê wê jiyana xwe ji dest daye ji bo tev li şînê bibe serî li rêveberiya girtîgehê da. Rêveberiya girtîgehê bi hinceta nikarin ewlehiyê bistînin serlêdana girtiya siyasî Avşîn Esma Başkale qebûl nekir.
Her wiha parêzer û malbata Avşîn Esma Başkale jî bi heman daxwazê serî li dozgeriya girtîgehê û rêveberiya girtîgehê da lê heya niha bersivek erênî ji bo malbat û parêzerê Avşîn Esma Başkale nehatiye dayîn.
Ji aliyê din ve dema ku Avşîn Esma Başkale li Girtîgeha Şakranê bû ji ber nexweşiya bavê xwe ya giran sewqa xwe ya bi pere çêkiribû û beriya 4 mehan anîbûn Rihayê.
Her wiha malbata Başkale bertek nîşanî biryara girtîgehê û dozgeriyê da û dan zanîn k udi navbera girtîgeh û cihê şînê 20 deqe ye lê dewlet cardin jî nahêle Avşîn Esma Başkale mafê xwe yên şîna bavê xwe bikar bîne.
