Meclisa Îslamî ya Elewî ya Bilind li Sûriye û Diyasporayê kiryarên hikûmeta demkî ya Şamê girtina bêserûber a welatiyên tev li xwepêşandanên aştiyane ya li perava Sûriyeyê bûne şermezar kir.
Meclisa Îslamî ya Elewî ya Bilind li Sûriye û Diyasporayê bi daxuyaniyekê kiryarên hikûmeta demkî ya Şamê yên girtina welatiyan piştî xwepêşandanên aştiyane li perava Sûriyeyê, şermezar kir.
Meclisê diyar kir ku bi armanca mafê diyarkirina çarenûsê, daxwaza pêkanîna federaliya siyasî û berdana girtiyan xwepêşandanên aştiyane hatin lidarxistin.
Di daxuyaniyê de hat diyarkirin ku li hemberî van tevgerên aştiyane hêzeke mezin hat bikaranîn, di encamê de sivîl bûn qurbanî û birîndar bûn. Her wiha hat destnîşankirin ku piştî xwepêşandanan oldar, kesayetên siyasî- civakî û ciwan, wek şêx Elî Helhel, şêx Ehmed Hebîb, çalakvanê siyasî Ektem Dîb, hatin girtin.
Meclisê di daxuyaniyê de diyar kir ku ev kiryar fikra çewsîner û zordarî ya sîstematîk e ku tu têkiliya wê bi dewleta qanûn an jî edaletê re tune ye, nîşan didin.
Di daxuyaniyê de hat gotin ku wekî her carê ji bo girtina welatiyan navê “bermahiyên rejîma Baas” li wan kir, bêyî ku tu delîlên qanûnî nîşan bide yan jî pêvajoyeke zelal a dadgeriyê veke. Ev jî hewldana sûcdarkirina xwepêşandanên aştiyane ye.
Di berdewama daxuyaniyê de hat amajekirin ku li beramber xwepêşandanên aştiyane hikumeta veguhêz rê da endam û alîgirên xwe, wan jî welatî qeti lkirin, talanî çêkirin, erebe û dikan şewitandin.
Meclisê berpirsa van sûcan yekser hilda ser hikûmeta demkî û bang li civata navneteweyî, rêxistinên hiqûqî, xwedî biryaran kir ku bi lezgînî destwerdanê bikin, tevahî girtiyan berdin û siyasetên zodariyê yên ku welat ber bi parçebûn û hilweşînê ve dibe rawestînin, hikûmetê mecbûr bikin ku biryara 2799an pêk bîne.
Di dawiya daxuyaniyê de îdiayên dibêjin ku meclis girêdayî kesayet û aliyan e hatin redkirin û hat gotin ku meclis ji bo ragihandina zehmetiyên gel û armancên wî hatiye avakirin.
