Meclisa Jinan a DEM Partiyê ya rêxistina bajarê Îzmirê ji bo heqareta alîgirên Bûrsasporê ku li Leyla Zanayê kiribûn daxuyaniyek da. Di daxuyaniyê de hat diyarkirin ku Leyla Zana, di hişê siyaseta gelê kurd, di şopa aşitiyê û têkoşîna zimanê zikmakî de xwedî ciheke taybet û semboleke gewre ye.
Meclisa Jinan a DEM Partiyê ya rêxistina bajarê Îzmirê ji bo heqareta alîgirên Bûrsasporê ku li Leyla Zanayê kiribûn daxuyaniyek da. Daxûyanî ji aliyê Hevseroka rêxistina DEM Partiyê ya Îzmîrê Fulya Erdoganê ve bi tirkî hate xwendin. Girseya ku tev li daxuyaniyê bû pankarta ‘’Leyla Zana rûmeta me ye’’ vekir û dirûşmeya ‘’Jin Jiyan Azadî’ berzkir.
Daxuyanî wihaye:
‘’Ev êrîş ne êrîşeke ku bêkontrol û ji nişkê ve pêk hatî û an jî ne bereteke alîgiran a ji rêzê bû. Ev êrîş, ji nû ve welidandina siyaseta şer, hişmendiya desthilatdariya meran û tepisandina têkoşîna jinên kurd bi xwe ye.’’
‘Leyla Zana semboleke gewre ye’
“Leyla Zana, di hişê siyaseta gelê kurd, di şopa aşitiyê û têkoşîna zimanê zikmakî de xwedî ciheke taybet û semboleke gewre ye. Ji ber vê êrîşa li Leyla Zana ne li keseke, li têkoşîna bi rêxistinkirîya jinên kurd, iradeya kirdebûna jinan a di warê siyasî de û rasterast li fikra aştiyê ye. Ev jî te wê wateyê ku ev ne êrîşeke munferîd e. Dixwazin pratîkên nijadperest û zayendperest bikin tişteke rewa û berbelavtir. Hê jî ev daxwaziya qirêj berdewam e. Meselen, beriya maça Bodrumspor û Amedsporê û piştî wê maçê êrîş birin ser alîgirên Amedsporê. Di wê êrîşê de jinek birîndar bû. Ev jî car din bi me dide zanîn ku di hemû waran de sazî, dezgeh û rêxistin û tîmên ku temsiliyeta nasnameya kurdan dikin, yek bi yek bi awayeke sîstematîk dikin hedef û hewl didin êrîşê bibin ser.”
‘Têkoşîna me dê li dijî nijadperestî faşîzm û zayendperestiyê bidome’
Têkoşîna me ya ku li dijî nijadperestî, faşizm û zayendperestiyê dê her bidome û em ê ti carî paş de gav neavêjin. Ne bi nefretê lê bi aştiyê. Ne bi înkarê lê bi heqîqetê li dijî desthilatdariya mêran bi azadiya jinan em ê bi ser bikevin.’’
