DFGê û MKGê ji bo Nazim Daştan û Cihan Bîlgîn bernameya bîranînê li dar xist. Di bîranînê de hate gotin ku dê têkoşîna heqîqetê ya Nazim û Cîhan bidomînin.
Komeleya Rojnamegeran a Dîcle û Firatê (DFG) û Komeleya Rojnamegerên Jin a Mezopotamyayê (MKG) bernameya bîranînê ji bo Nazim Daştan û Cihan Bîlgîn ên ku dema geşedanên li Bakûr Rojhilatê Sûriyê dişopandin 19ê Kanûna 2024an ji aliyê SÎHAya Tirkiyeyê ve hatin kuştin, li dar xist. Bername li Şaxa Egîtîm Senê ya Jimara 1an a li Konaka Îzmîrê hate lidarxistin.
Piştî deqeyekê rêzgirtinê sînevîzyona ku hatibû amadekirin hate temaşekirin.
Endama MKGê rojnameger Naz Ozek di bîranînê de axivî û got: “Hevalên me rojnameger bûn û ji bo rastiyê ragihînin raya giştî ya cihanê li wir bûn. Di ser kuştina Cîhan Bîlgîn û Nazim Daştan re salek derbas bû. Tevî ku li ser wesayita wan ‘Çapemenî-Press’ dinivisî jî bûn armanca êrişê. Li gel vê yekê jî saziyên mafên mirovan navneteweyî derbarê kuştina wan de tu lêpirsîn nedan destpêkirin û bêdeng man. Me careke din dît ku dema mijar dibe kurd ya li hemberî me an dibin dujmin an jî ker û lal dibin. Lê em wek generalên piçûk ên Apê Musa em ê bi şopandina heqîqetê hesabê wan bipirsin. Em ê nehêlin kameraya wan bikeve û pênûsa wan bişkê. Dê rêya wan doza me û têkoşîna me ronî û geş bike. Em hevalên xwe yên ku di vê rêwitiyê de bi canê xwe berdel dane tu car bîr nakin û nadin jibîrkirin. Bijî ragihandina azad.”
Rojnameger Can Kirbaş, Nûjîn Yildiz û Ugurcan Boztaş jî di axaftinên xwe de hevalên xwe bibîr anîn û gotin ku dê her tim şopdarên rêya şehîdên çapemeniya azad bin.
