Li Stenbolê 5 rojnamegerên ku ji bo çalakiya bîranina Cîhan Bîlgîn û Nazim Daştan tev li çalakiyê bûn û doz li wan hatibû vekirin, di danişîna îro de hatin beraetkirin.
Rojnameger Cîhan Bîlgîn û Nazim Daştan ku li Rojava dema êrişên li ser Rojava dişopandin di êrişa dewleta Tirk de jiyana xwe ji dest dabûn. Li Stenbolê jî ji bo Cîhan Bîlgîn û Nazim Daştan rojnamegeran xwestibû bernameya bîranînê li dar bixin. Polîs êrişî rojnamegeran kiribû û gelek kes hatibûn binçavkirin. 5 ji wan jî rojnameger bûn û bi îdiaya “li dijî qanûna civîn û meşê mixalefetê kirin e” doz hatibû vekirin. Îro danişîna duyemîn a dozê li Dadgeha Çaglayana Stenbolê hate lidarxistin.
Nûnerên Komeleya Rojnamegeran a Dîcle Firat (DFG), Komeleya Rojnamegerên Jin a Mezopotamyayê (MKG), Komeleya Hiqûqê û Xebatên Medyayê (MLSA) û parêzerên rojnamegeran tev li dozê bûn.
Dozger mutalaya xwe pêşkeşî heyeta dadgeriyê kir. Parêzeran parastina miwekîlên xwe kir. Piştî parstina parêzeran, heyeta dadgehê derbarê rojnameger Zeynep Kuray, Mahsum Saglam, Pelîn Laçîn, Yagmûr Fîlîz û Yadîgar Aygun de biryara beraetê da.
Her wiha heyeta dadgehê li Yagmûr Fîlîz jî bi hinceta “li dijî peywîrdarê dewletê rabûye û heqaret kiriye” 35 hezar û 400 lîre cêzayê pereyan lê birî.
