Şêwirmendê Polîtîkayên Dereyî yê Serokwezîrê Yewnanistanê Sotiris Serbos berî hevdîtina Serokwezîrê Yewnanîstanê Mîçotakîs û Serokwezîrê Îsraîlê Netanyahû axivî û diyar kir ku hêza leşkerî ya ji hêla Îsraîl, Yewnanistan û Qibrisê ve hatiye avakirin dê li hemberî Tirkiyeyê bibe mertalê parastinê û angaşta Tirkiyeyê ya “welatê şîn” ji holê rake.
Rikeberiya di navbera Îsraîl-Yewnanistan-Qibris û Tirkiyeyê de li deryaya Ege û rojhilatê derya Spî hindî diçe zêde dibe. Şêwirmendê Polîtîkayên Derveyî yê Serokwezîrê Yewnanistanê Sotiris Serbos bi bîr xist ku demek berê di navbera Îsraîl-Yewnanîstan û Qibrisê de hêzek hevpar a leşkerî hatiye avakirin û wiha got: “Ev hêz ji bo me gavek dîrokî ye. Armanca vê hêzê û hedefên wê yên sereke ew e ku li dijî hemû gefan berjewendiyên me biparêze. Ango ev hêz dê li hemberî Tirkiyê wezîfeya mertalekê bibîne.”
Mîçotakîs û Netanyahû ji bo mezinkirina tifaqê tên cem hev
Serbos di beyana dayî çapemeniyê de got ku tifaqa Îsraîl û Yewnanîstanê berî her tiştî dê stratejiya, “welatê şîn-mavî vatan” ya tirkiyeyê bêbandor bike. Serbos li ser mijarê ev tişt anîn ziman: “21ê Kanûnê de serokwezîrên her du dewletan tên cem hev. Ev hevdîtin dê di navbera her du welatan de ji bo gavên nû bibe destpêkek. Divê em ji hemû senaryoyan re amade bin û ji bo vê yekê pêşxistina hevkariya leşkerî girîng e.”
Yewnanistan dixwaze mûdahîlî Sûriyê bibe
Di berdewama axaftina xwe de Serbos anî ziman ku ji ber polîtîkayên Tirkiyeyê êdî Yewnanistan ne tenê Gazze dixwaze mûdahîlî meseleya Suriyê bibe. Serbos derbirî ku niha di warê mûdahîlbûna meseleya Sûriyê de bernameyek zelal tunebe jî di vî warî de îradeyek siyasî derketiye holê.
Îsraîl, Yewnanistan û Qibrisê hêza leşkerî ya hevpar avakiribû
Di serê meha Kanûnê de Îsraîl, Yewnanistan û Qibrisê ragihandubû ku hêzek leşkerî ya ji 2 hezar 500 leşkeran pêk tê ava kirine. Di vê çarçoveyê de peymanên leşkerî yên di navbera her sê welatan de jî hatibûn daxuyandin. Piştî ragihandina vê hêzê Yewnanistanê pergala SPIKE ya parastinê ku ji Îsraîlê kirî bû li garên Egeyê bi cih kiribû.
