Amed – Nûçegîhanê ANHAyê Rênas Remo ku 9 salan hevaltiya Cîhan Bîlgînê kiriye ew di salvegera kuştina wê de bi bîr anî û wiha behsa wê kir: “Şehîd Cîhan kedeke pir mezin da, her tim bi hêz û bi moral dixebitî. Tu cara pênûs û kameraya wê li erdê namîne”
Cîhan Bîlgîn, 27ê Cotmeha 1995an de li navçeya Midyadê ya Mêrdînê ji dayîk bû. Cîhan Bîlgîn ku di sala 2014an de Çapemeniya Azad nas kir li Amedê bi belavkirina rojnameya Azadiya Welat û Ozgur Gundemê dest bi xebatên xwe kir. Cîhan Bîlgînê dema ku rojnameyên Azadiya Welat û Ozgur Gundemê belav dikir, beşdarî çalakiyên nobedê yên li ser sînorê Kobanê li navçeya Pirsûs a Rihayê, li dijî êrişên dagirker ên DAIŞê yên li ser Kobanê bû. Piştî ku Cîhan Bîlgîn demeke kurt li Dihaberê xebitî, di sala 2017an de derbasî Bakur û Rojhilatê Sûriyeyê bû û li Ajansa Nûçeyan a Hawarê (ANHA) ku li wir weşanê dike, dest bi xebatê kir. Cîhan Bîlgînê ligel Nazim Daştan, heta kêliya dawî ya jiyana xwe bûn şopdarên heqîqetê. Rojnameger Nazim Daştan û Cîhan Bîlgîn dema êrişên dewleta tirk û koma wê ya paramîlîter a SMOyê yên li ser Bakur û Rojhilatê Sûriyeyê dişopandin, di 19ê Kanûna 2024an de ji hêla dewleta tirk ve bi SÎHAyan hatin kuştin.
Nûçegihanê Ajansa Nûçeyan a Hawarê (ANHA) Rênas Remo ku bi Cîhan Bîlgînê re xebîtî ye, Nazim Daştan û Cîhan Bîlgîn bi bîr anîn û behsa Cîhan Bîlgînê kir.
‘Hevala Cîhan dixwest rastiya gel nîşanê cîhanê bide’
Rojnameger Rênas Remo da zanîn ku 9 salan bi Cîhan Bîlgînê re xebîtiye. Rênas Remo, anî ziman ku Cîhan Bîlgîn her tim bi moral û kêfxweşî xebatên bi cih dianî û wiha got: “Em di ANHAyê de bi hev re dixebitîn. Heval Cîhan pir ked dida, bûyereke nû çêbiba dixwest em zû herin ew ê jî bidin. Xwesteka wê pir zêde bû. Dixwest rastiya gelê Bakur Rojhilatê Suriyeyê di cîhanê de bê xuyakirin. Hewl dida rastiya Bakur û Rojhilatê Suriyeyê, gelê Suriyeyê nîşan bide. Dema erişên dewleta Tirk li ser herêma me çêdibûn dixwest bi lez bide nîşandan. Xwesteka Şehîd Cîhan ew bû ku rastiya gel, rastiya şoreşê bi cîhanê bide xuya kirin.”
‘Dewleta Tirk dixwest dengê ragihandina me qut bike’
Rênas Remo bi lêv kir ku dewleta Tirk şoreşa Bakur û Rojhilatê Suriyeyê weke dijmin didît û dixwest ragihandinê bêdeng bihêle û wiha dîrêjî da axaftina xwe: “Destpêka Şoreşa Bakur Rojhilatê Suriyeyê dewleta Tirk ew şoreş weke dijmin ji xwe re didît. Cîhan keseke ku ev rastî dida xuyakirin, ragihandin bû. Ew siyaset çeteyên DAÎŞê jî dida meşandin. Me dît ku çeteyên DAIŞê çawa li Dêrazorê hevala me Dilîşan û hevalê me Rizgar kirin armanç û şehîd kirin. Dewleta Tirk jî wisa bû dixwest dengê ragihandina Bakur û Rojhilatê Suriyeyê qut bike. Dewleta Tirk hevalên me Nazim û Cîhan bi piştgiriyeke hovane armanç girtin û ew şehîd kirin.”
‘Berxwedana Bendava Tişrînê nîşanî cîhanê dan’
Rênas Remo diyar kir ku dewleta Tirk bi çapemeniya xwe dixwest têkildarî Tişrînê moralê gel xera bike lê Cîhan Bîlgîn û Nazim Daştan ji roja ewil ve çûne cihê bûyerê û rastî dane xuyakirin. Rênas Remo axaftina xwe wiha domand: “Piştî hilweşandina rejîma BAASê ya Suriyeyê çeteyên girêdayî Tirkiyeyê berê xwe dan Bakur û Rojhilatê Suriyeyê û xwestin derbasî herêma Tişrînê bibin lê Hêzên Suriye yê Demokratîk li vê derê berxwedaneke gelek mezin nîşan dan. Her wiha wê demê çapemeniya dewleta Tirk ji bo moralê gelê me xera bike propaganda dikir û digot ‘em ê tevahî Bakurê Suriye yê kontrol bikin.’ Di wê demê de, ji roja ewil ve hevala me Cîhan û hevalê me Nazim pênûsê xwe, kameraya xwe girtin û berê xwe dane vê derê. Bêtirs, bi moraleke bilind her roj agahiyên ku çapemeniya dewleta Tirk radigihandin pûç dikirin. Berxwedana gel û Hêzên Sûriyeya Demokratîk a mezin a li ser Bendava Tişrînê nîşanê tevahî cîhanê dan. Bi rastî çavên me jî li wan bû, dilê me li ser wan bû. Dema ku xebera şehadeta wan hat em gelek bi bandor bûn.”
‘Berxwedana wan dê her tim berdewam bike’
Dawiya axaftina xwe de Rênas Remo ani ziman ku tu carî hevalên xwe ji bîr nakin dê her tim li ser şopa wan bimeşin û ev tişt gotin: “Em jî weke rêhevalên şehîd Cîhan Bîlgîn em soza xwe her tim jê re nû dikin. Salek bi ser şehadeta wan re derbas bû. Pênûsa wan, kameraya wan li erdê namîne. Em ê xwestekên wan ên ku nîşandana rastiya gel, rastiya Bakur û Rojhilatê Suriyeyê, berxwedana şervanan, berxwedana gel her tim nîşan bidin, em ê her tim rastiyê bişopînin. Ew bûne mînak ji bo ragihandinê, ji bo gelê me. Berxwedana wan dê berdewam dike.”
