Parlamentoya Gallerê (Senedd) ya welatê Brîtanyayê piştgirî da pêvajoya li Tirkiyeyê ya ku di navbera Tevgera Azadiya Kurd û dewleta Tirk de tê meşandin û ragihand ku ji bo aştiyê “derfeteke dîrokî” ye.
Parlamenterên Partiya Neteweyî (Plaid Cymru) Rhys ab Owen û Heledd Fychan di nîqaşên parlamentoyê de bal kişandin ser pêvajoya di navbera dewleta Tirk û Rêberê Gelê Kurd Abdullah Ocalan de tê meşandin û xwestin ku parlamento li ser vê mijarê daxuyaniyek fermî bide.
Di encama nîqaşan de parlamentoyê nêrîn û daxuyaniya bangewaziyê ya li ser pêvajoya aştiyê pejirand.
Di daxuyaniya ku li ser malpera fermî ya parlamentoyê jî hat weşandin de hat diyarkirin ku pêvajoya aştiyê derfeteke dîrokî ye.
Di daxuyaniyê de bal kişandin ser “agirbest, bêçekkirin, belavkirina avaniyên çekdar û vekişîna di bin çavdêriya parlamentoyê de bi kêfxweşî pêşwazî dikin.”
Seneddê piştgiriya xwe ji bo pêvajoya aştiyê ragihand û li ser bernedana girtiyên siyasî metirsiya xwe anî ziman. Seneddê bang kir ku divê erka mafên mirovan ên navneteweyî were pêkanîn.
Seneddê bi bîr xist ku piştgiriyê dide hewldanên civakên Kurd û Tirk ên li Galler û Brîtanyayê ya ji bo çareseriya aştiyane û wiha domand:
*Pêvajoya aştiyê ya li Tirkiyeyê di navbera tevgera Kurd û dewleta Tirk de fersendek dîrokî ye.
*Agirbest, bêçekkirin, belavkirina avaniyên çekdar û vekişîna di bin çavdêriya parlamentoyê de bi kêfxweşî pêşwazî dikin.
*Metirsiya xwe ya li ser bernedana girtiyên siyasî tînin ziman û divê erka mafên mirovan ên navneteweyî were pêkanîn.
*Hikûmeta Gallerê bi Brîtanya û civaka navneteweyî re, bang her kesî dikin ku piştgiriyê bidin çareseriya ku rêz nîşanî demokrasî, mafên mirovan û serweriya hiqûqê dide.
*Piştgiriya xwe ji bo hewldanên civakên Kurd û Tirk ên li Galler û Brîtanyayê ji bo çareseriyek aştiyane piştrast dike.
