Endama TÎHVê Ayfer Şahîn Bîlîcî ku di daxuyaniya ji bo Hefteya Mafên Mirovan de axivî, bal kişand ser giringiya aştiyê û got: “Êdî dem dema bi aqilêselîm, bi wêrekî û biferasetî vekirina rûpeleke nû, rojek berî rojekê avakirina aşitiyeke erênî ye.”
Saziyên demokratîk ên Wanê bi pêşengiya Komelaya Mafên Mirovan (ÎHD) li Kolana Hunerê ya Rêya Armûşê ya Wanê ji bo 10 û 17ê Kanûnê Hefteya Mafên Mirovan daxuyanî dan. Di daxuyanîye de pankarta “10 û 17ê Kanûnê Hefteya Mafên Mirovan” hat vekirin. Endam û rêveberên DEM Partî û DBPê, nûnerên saziyên sivîl û gelek welatî tev li daxuyaniyê bûn.
‘Rêya parastina rûmeta mirovan aştî ye’
Endama Weqfa Mafên Mirovan a Tirkiyeyê (TÎHV) Ayfer Şahîn Bîlîcî metna daxuyaniyê xwend û diyar kir ku bingehtirîn rêya parastina rûmeta mirovan aşitî ye.
Ayfer Şahîn Bîlîcî diyar kir ku pirsgirêka Kurdî bi eslê xwe meseleyeke mafên mirovan û demokrasiyê ye û got: “Hewl û têkoşîna Kurdan a zêdetirî sed salan, li ser qebûlkirina ziman û çanda Kurdî ye, li ser domkirina hebûna Kurdan e, ango bi awayekî yasayî û makeyasayî garantîkirina mafên Kurdan yên kolektîf e. ÎHD, ji bo aşitiyeke mayînde pêk bê, amade ye ku her cure alîkarî û tevkariyê pêşkeş bike. Em di wê baweriyê de ne ku, çareseriya aşitiyane ya pirsgirêka Kurd, dê feydeyên girîng bide hemû gel û qadên civakî yên li Tirkiyeyê dijîn û dê ji bo avakirina demokrasî û dewleteke hiqûqî jî derfetên girîng derxîne holê. Sedemên ji bo em wêrek bin êdî zêdetir in. Çek hatin şewitandin û dengê wan hat birîn. Êdî dem dema bi aqilêselîm, bi wêrekî û biferasetî vekirina rûpeleke nû, rojek berî rojekê avakirina aşitiyeke erênî ye.”
‘Aştî ji ber xwe ve nayê’
Ayfer Şahîn Bîlîcî anî ziman ku ew parêzvanên mafên mirovan dizanin ku aşitî ji ber xwe ve nayê û wiha bi dawî kir: “Ew ên ku dê aşitiyê bînin em in. Ew ên ku li dijî qetlîamên jinan û li dijî cihêwaziya zayendî têdikoşin, jin in. Ew ên ku li dijî îstîsmarkirin û karkeriya zarokan têdikoşin, zarok û parêzvanên mafên zarokan in. Ew ên ku ji bo jiyan hejayî weqara mirovan be têdikoşin, karker û kedkar in. Yên ku xewna jiyaneke bi hev re, di nav aramî û xweşiyê de û wekhev û azad dibînin, gelên me ne.”
Piştî daxuyaniyê belavok belavkirin û çalakî bi dawî bû.
