Hevserokên HDPê yên berê Fîgen Yuksekdag û Selahattîn Demîrtaş ji girtîgên ku lê dimînin peyam ji konferansê re şandin û diyar kirin ku deriyê serdemeke nû li Tirkiyeyê vebûye û xwestin her kes ji bo aştî û demokrasiyê têbikoşin.
Konferansa Navneteweyî ya Aştî û Civaka Demokratîk a DEM Partiyê li Navenda Çandê ya Cem Karaca ya Stenbolê di roja duyemîn de berdewam dike. Di konferansê de Hevserokên HDPê yên berê Fîgen Yuksekdag û Selahattîn Demîrtaş peyam ji konferansê re şandin. Cîgira Hevserokên Giştî yên DEM Partiyê Ebrû Gunay peyamên Fîgen û Selahattîn xwend. Peyamên Fîgen û Selahattîn wina ne:
Peyama Hevseroka HDPê ya berê Fîgen Yuksekdag a ku li Girtîgeha Sîncanê girtî ye wiha ye:
Ez Konferansa Aştî û Civaka Demokratîk a Navneteweyî bi rêzdarî û hezkirin silav dikim. Di vê dema ku gelên Tirkiye, Kurdistan, herêm û cîhanê di bin dorpêça şerê giran de tên eciqandin, mirov karibe bibe dengê aştî û demokrasiyê û bibe hêza têkoşîna çareseriyê gelek girîng e.
Bi banga Birêz Ocalan a “Aştî û Civaka Demokratîk” re ji bo Tirkiyeyeyê û hemû gelên herêmê deriyê serndemek nû vebû. Yên ku ruh, wate û hêzê bide vê serdema nû, dê yekîtiya xurt a demokratîk a hemû gelên me yên bindest, gelên herêmê, jin û ciwan bin. Bi bawerî û biryara ku ev konferans dê bibe ruh û hişê vê tevgerê, ez hemû kesên ku keda wan tev li vê konferansê bûye û hemû beşdaran bi rêzdarî silav dikim.
Peyama Hevserokê Giştî yê HDPê yê berê Selahattîn Demîrtaş ku niha li girtîgeha Edîrneyê ye jî wiha ye:
Ez hemû kesên ku ji bo Konferansa Aştî û Civaka Demokratîk a Navneteweyî li Stenbolê kom bûne û avakirina civakeke demokratîk, aştî û bi edalet armanc dike, tevan silav dikim. Di vê serdema ku di dîroka mirovahiyê de qeyrana herî kûr dijî de êdî aştî ji bo me û hemû gelên cîhanê
mecbûrî ye. Polîtîkayên şer ku otoriteriyê, înkarê û newekheviyê pêş dixe, bi xwe re talankirin, wêrankirin û xerakirinê tîne. Ne tenê erdnîgariya me, wîcdanê me jî birîndar kiriye. Ji ber vê yekê axaftina vê konferansê dê siberoja me diyar bike. Aştî ne tenê berdana çekan û bêdengkirina çekan e. Aştî bi edalet, azadî, wekhevî û jiyaneke bi rûmet pêkan e. Aştî, bi hîskirina Kurd, Tirk, Ereb, Ermenî, Elewî, Sunî u hemû baweriyan a vê axê pêkan e. Divê her kes xwe wekî hemwelatiyeke azad li ser vê axê hîs bike û karibe bi awayekî aram bijî.
Civaka demokratîk jî ne bi tirs, fikar û zextan pêş dikeve. Civaka demokratîk bi tevlêbûna demokratîk, bawerî, vîna azad û bihevre jiyana hemû nasnameyan pêkan e. Ne tenê zimanek, ne tenê çand, bawerî û nijadek, Divê hemû cudahî, reng, bawerî û nasname wekhev û azad bi hevre bijîn.
Li gorî vê wateyê sekna wêrek û bi biryar a Birêz Ocalan pir bi qîmet û watedar e. Xwezî ev pêşdarazî bihatina rakirin û Birêz Ocalan karibuya raste rast bi civakê re bihata cem hev û bi civakê re bi axiviya. Ez bawer dikim wê demê dê hemû fikarên gelên Tirkiyeyê û hêrsa hemû kesan bitefiya. Çareseriya demokratîk û diyaloga aştiyane ji boü me tevan pir bi qîmet e.
Divê Tirkiye êdî ne bi polîtikayên înkar, cudakarî, wêdekirin û tunehesibandinê bê birêvebirin. Divê Tirkiye êdî bi polîtîkayên demokrasî, aştiya civakî û serdestiya hiqûqê bê birevebirin. Divê bi jiyana hevpar û wekhev bê birêvebirin.
Herî dawî vê yekê bibêjim. Ji bo me hemûyan aştî pêkan e. Demokratî pêkan e. Welatekî wekhev, azad û bi hevre pêkan e. Ji bo vê yekê em têikoşin. Ez we hemûyan bi hezkirin û rêzdarî silav dikim. hemû kesên ku keda wan tev li vê konferansê bûye pîroz dikim.
