Çalakiya nobetê ya li dijî êrişên li ser Bakur û Rojhilatê Sûriyeyê ku li sînorê Kobanê hatiye destpêkirin di roja 7an de didome. Çalakgeran xwestin ku îradeya çareserî û aştiyê ya Rêberê PKK’ê Abdullah Ocalan esas bê girtin û gotin: “Em li peyama Rêber Abdullah Ocalan xwedî derdikevin.”
DBP, TJA û DEM Partiyê di 23ê Kanûnê de li dijî êrişên dewleta tirk û koma wê ya paramîlîter SMOyê yên li ser Bakur û Rojhilatê Sûriyeyê, li ser sînorê navçeya Pirsûs a Rihayê û Kobanê dest bi çalakiyê kirin. Çalakiya nobete di roja 7an de didome. Komeleya Rojnamegeran a Dîcle Firatê (DFG), Komeleya Rojnamegerên Jin ên Mezopotamyayê (MKG), Komeleya Wêjekarên Kurd, PENa Kurd, Yekitiya Weşangerên Kurd (YEWKURD), Komeleya Lêkolînên Çanda Devkî Dîrok Wêjeyê (SOZ-DER), parlamenterên DEM Partiyê Ferît Şenyaşar, Dîlan Kunt Ayan, hevşaredarên DEM Partiyê, rêveberên DEM Partî û DBP’ê, pêkhateyên Platforma Ked û Demokrasiyê ya Rihayê, endamên Meclisa Dayikên Aştiyê û gelek kesên din tev li çalakiya îro bûn.
Çalakgeran di çalakiyê de pankarta “Rojava rûmeta me ye” hilgirtin û daxuyanî hildan. Hevşaredarê Xelfetî ya Rihayê Mehmet Karayilan di daxuyanî da û got: “Hûn nikarin Pirsûs û Kobanê ji hev cuda bigirin. Kobanê, bi têkoşîna gelên cîhanê hat bidestxistin. Niha li ser qadên jiyanê yên gelan gef hene. Ev gef li ser hemû gelên herêmê ye. Guleyên diavêjin Kobanê li dilê me dikevin. Em îro bi kelecan şiyar bûn ji ber ku ji Îmraliyê xeber hat. Bi muxatabê çareseriya pirsgirêka Kurd Rêber Abdullah Ocalan re hevdîtin hate kirin û em jî li ser sînorê Kobanê ji Rêber Abdullah Ocalan re silav dişînin. Divê bersivê bidin hewldanên aştî û çareseriyê yên Abdullah Ocalan. Em jî dê xwedî li peyama Îmraliyê derkevin û têkoşîna xwe mezintir bikin.”
‘Em Kobanê bi tenê nahêlin’
Berdevkê Demê yê Platforma Ked û Demokrasiyê ya Amedê Ahmet Baran jî geşedanên li Sûriyeyê û got: “Kurdên Sûriyeyê bi tenê nînin. Em ê destûrê nedin Kurd qurbanî terorîzma cîhadîstan bên kirin. Divê ev êriş bên sekinandin û tavilê muzakere dest pê bikin. Me duh li dijî terorîzma DAIŞ’ê çawa piştevanî kiribe, dê îro jî Kobanê bi tenê nehêlin.”
Hevserokê Komeleya Wêjekarên Kurd Rêdûr Dîcle jî wiha got: “Êriş û gefên li dijî xaka Rojavayê û rêveberiya Rojavaya ku jiyaneke nû lê tê avakirin û ji bo hemû reng, deng û baweriyan cihê hêviyê ye, eşkere li meydanê ye. Di serî de Tirkiye û hin hêzên din ku ji jiyana nû ya li Rojavayê hatiye avakirin û ji bo hemû gelen cîhanê bûye îlham ditirsin, dixwazin van geşedanên dawî veguherînin firsendekê. Bi vê re jî, vê pergala jiyana nû ya ji aliyê gelen Sûriyeyê ve hatiye qebûlkirin û ji bo aramiya herêmê cihê hêviyeke mezin e, ji holê rakin. Ji bo vê jî, bi awayekî tund êriş dikin; jîngeh, sivîl û rojnamevan jî tê de her tiştî hedef digirin. Banga me ji bo raya giştî ya Tirkiyeyê û navneteweyî jî ew e ku li hemberî van gef û êrişên ku dixwazin jiyana gelan a bi kedeke mezin hatiye avakirin bêdeng neminin û bi her awayî li dijî van êrişan rabin. Ji lew re Rojava, tenê ne ji bo Kurdan, ji bo hemû gelan hêvî ye.”
‘Deng bidin banga Abdullah Ocalan’
Parlamentera DEM Partiyê ya Rihayê Dîlan Kunt Ayan jî anî ziman ku pergala hevjiyana azad a li Bakur û Rojhilatê Sûriyeyê hedef tê girtin û got: “Netewe dewlet 100 sal in dixwazin gelan tune bikin. Lê hesabên wan hev negirtin. Dem dema yekitiyê ye ku em hêviyê mezin dikin. Ji Rêber Abdullah Ocalan silav hat. Abdullah Ocalan got ku dê ji hêla pozîtîf ve piştgiriyê bide pêvajoyê. Em jî li ser sînorê Kobanê, bi ruhê berxwedana Kobanê bang li gel û hemû rêxistinên civaka sivîl dikin ku deng bidin vê bangê. Divê tavilê zemîna siyaseta demokratîk were amadekirin.”
Daxuyanî bi dirûşmên “Bijî berxedana Rojava”, “Hezar silav ji Îmraliyê re” û “Bijî Serok Apo” bi dawî bû.
