Tora Mafên Mirovan a Kurdistanê destnîşan kir ku di salekê de 30 jin li Rojhilatê Kurdistanê hatin kuştin û 23 jin jî hatin binçavkirin.
Rêxistina Tora Mafên Mirov a Kurdistanê bi boneya pêngava 16 rojî ya çalakiyên li dijî tûndiya li ser jinê, têkildarî rewşa jinên Rojhilatê Kurdistanê rapora salekê weşand. Di raporê de hatiye diyarkirin ku di navbera 25ê Mijdara 2024an heta 25ê Mijdara 2025an de li bajarên cûda yên Rojhilatê Kurdistanê 2 jin hatine darvekirin, 30 jin hatine qetilkirin ji vana 5 jin temenê wan di jêr 18 saliyê de bûn.
Di raporê de hatiye diyarkirin ku 9 jinên Kurd ku girtiyên siyasîne, di girtîgehên li Rojhilatê Kurdistan û Îranê de hatine cezakirin, 2 ji wan jî metirsiya darvekirinê li ser hene. Hate gotin ku di nava salê de 23 jinên Kurd ji ber çalakiyên xwe yên sivîl, wêjeyî, siyasî, pîşeyî û tevlîbûna kombûnan bêy ku tometek diyar ji wan re bê nîşandan, hatine binçavkirin. Di raporê de hatiye diyarkirin ku 15 jinên Kurd cezayên wek yê girtîgehê, darvekirinê, derxistina ji kar, xanenişînkirina bi zorê, cezayên dadwerî û îdarî lê hatine birîn.
Di dawiya raporê de jî hatiye gotin ku 5 jinên Kurd ku berê cezayê girtîgehê lê hatibûn birîn, ji bo bicihanîna cezayê wan, ew şandine girtîgehên Urmiye û Sine yê.
