Enqere – Rêveberê Ciwanên Partiya Zahmetkeşên Kurdistanê parêzer Shko Şhwan diyar kir ku perspektîfa Abdullah Ocalan ji bo hemû Rojhilata Navîn çareserî ye û got: “Em dixwazin bi Abdullah Ocalan re hevdîtinê bikin.”
Ciwanên endamên Partiya Zahmetkeşên Kurdistanê û Partîya Sosyalîsta Kurdistan (PASOK), ji bo pêvajoya Aştî û Civaka Demokratîk, ji herêma Federe ya Kurdistanê hatin bakurê Kurdistanê û Tirkiyeyê. Ciwanan li Amed, Riha, Mêrdîn û Enqereyê hin hevdîtin kirin. Ciwan di serî de beşdarî panela Yekitiya Netewî ya Ciwanan ku li Mêrdînê pêkhat bûn. Piştre jî serdana gundê Amara ya navçeya Xelfetî ya Rihayê ku Rêberê Gelê Kurd Abdullah Ocalan lê ji dayik bûyî kirin. Ciwan herî dawî jî hatin Enqereyê. Ciwanan ji bo bi Rêberê Gelê Kurd Abdullah Ocalan re hevdîtin bikin daxwazname dan Wezareta Dadê û li ber wezaretê daxuyanî dan.
Ji ciwanên ku ji bo serdana Girava Îmraliyê serî li Wezareta Dadê dan, Rêveberê Ciwanên Partiya Zahmetkeşên Kurdistanê parêzer Shko Şhwan tekildarî armanca hatina bakurê Kurdistanê û Tirkiyeyê ji Ajansa Welat (AW) re axivî.
‘Armanca me piştgiriya pêvajoya Aştî û Civaka Demokratîk e’
Parêzer Shko Şhwan ku ji Kerkukê hatiyê diyar kir ku gelek partiyên Başurê Kurdistanê xwestinê bi wan re werin, lê ji ber vîze derneket nekarîbûn bên û li ser armanca xwe wiha got: “Em şandeyeke ji endamên partiyên Kurdistanê hatine. Armanca me piştgiriya pêvajoya Aştî û Civaka Demokratîk e. Em dixwazin ew pêvajo berdewam dike û pirsgirêka Kurd çareser bibe. Em dixwazin gelê Kurd di bin destiyê derkeve. Ji bo wê me jî serdana Bakurê Kurdistanê û Tirkiyeyê kir. Em dixwazin li vir gelek kesên siyasetmedar re hevdîtinê bikin. Em dixwazin biçin Girava Îmraliyê û serdana Rêber Ocalan bikin. Em dixwazin bi vê serdanê piştgiriya pêvajoyê bikin û bi cihanê re parve bikin.”
‘Şer êdî di vê serdemê de bi dawî dibe’
Di berdewama axaftina xwe de Shko Şhwan destnîşan kir ku perspektîfa Aştî û Civaka Demokratîk ji bo tevahî Rojhilata Navîn çareseriye û wiha axivî: “Ew pêvajo ji bo tevahî herêmê aramî û başî ye. Ev pêvajo ji bo hemû gelên Rojhilata Navîn bi hev re azad û wekhev bijîn pêngava herî baş e. Li Rojhilata Navîn sedsala borî bi şer derbas bû. Di vê sedsalê de jî guherînek di Rojhilata Navîn heye. Divê gelên li Rojhilata Navîn jî li gor vê guherînê tevbigere û ew şer êdî raweste. Şer êdî di vê serdemê de bi dawî dibe. Êdî gelên li Rojhilata Navîn jî li gor vê tevbigerin. Divê gelên li Rojhilata Navîn di vê baweriyê de bin ku di vê serdemê de çareseriya herî baş jiyana bi hev re ye. Tu gelên Rojhilata Navîn ji vî şerî sûdê nagire. Heke em hemû bi hev re bijîn, dibe mînakeke nû.”
‘Ciwan rolekî mezin digirin ser xwe’
Di dawiya axaftina xwe de Shko Şhwan bi lêv kir ku ew ji berê ve ji bo aştiyeke mayinde li herêmê têdikoşin û dê niha jî ji bo aştiyê bitêkoşin. Shko Şhwan bal kişand ser rola ciwanan û axaftina xwe wiha bi dawî kir: “Weke ciwan em jî divê piştgiriya aştiyê bikin. Ciwan ji bo pêşerojê rolekî mezin digirin ser milê xwe. Divê em berpirsyariyê bigirin ku ew pêvajo baş derbas bibe. Ji niha û şûn vê jî ji bo aştiyeke mayinde pêk were xebatên me dê bidomin. Di vê demê de jî bi kêfxweşî em vê weke erkeke digirin ser milê xwe ku em di vê pêvajoyê de berpirsyariya xwe pêkbînin. Em dibêjin aştî ji bo hemû gelan e. Divê em hemû gel bi hev re wekhev, azad û di nava aştiyê de bijîn.”
