Hevserokê Giştî yê DEM Partiyê Tuncer Bakirhan di bernameya partiya xwe de axivî anî ziman ku tevî gavên dîrokî ji aliyê Rêberê Gelê Kurd Abdullah Ocalan ve hatine avêtin jî dewletê tu gav neavetiye û got ku pêvajo bi yek alî nameşe.
Rêxistina Partiya Wekhevî û Demokrasiyê ya Gelan (DEM Partî) a Enqereyê li resturanteke navçeya Çankaya ya Enqereyê ji bo piştgiriyê xwarin da. Hevserokê Giştî yê DEM Partyê Tuncer Bakirhan, parlamenterên DEM Partî, endam û nûnerên saziyên demokratîk û gelek kes tevlî bûn. Bername bi guhdarkirina stranan destpê kir. Piştre jî hevserokên DEM Partî yên Enqereyê axivîn û xêrhatina gel kirin.
Hevserokê Giştî yê DEM Partiyê Tuncer Bakirhan di axaftina xwe de kesên di têkoşîna azadî, aştî û demokrasiyê de jiyana xwe ji dest dane bi bîr anî û ji bo mamosteyê Çapemeniya Azad rojnameger û nivîskar Huseyîn Aykol ku meheke ku li beşa lêneherîna awartê ya nexweşxaneyê tê derman kirin şifa xwest. Tuncer Bakirhan di şahsê Seyîd Riza de qurbaniyên komkujiya Dêrsîmê bi bîr anî û wiha got: “Divê edî komara Tirkiyeyê demokratik bibe. Komar ev sed sal in ji bo gelan êş û xwîn anî. Edî bila ew serdem cuda bibe. Bi têkoşîna me jî wê cuda bibe. Di vê sedsalên derbasbûyî de ziman, çand û nasname tune hatin hesibandin. Em jî dibêjin edî bila reng tune neyên hesibandin.”
‘Divê dewlet jî gav bavêje’
Tuncer Bakirhan bal kişand ser banga dîrokî ya Rêberê Gelê Kurd Abdullah Ocalan û wiha dirêjî da axaftina xwe: “Birêz Ocalan deriyeke nû vekir. Rojhilata Navîn niha şer û pêvçûnan de ye. Sedema wê jî pergalên heyî ye. Ji ber tunehesibandin û bê demokratîkbûyinê ew şer û pêvçûn hene. Em niha di pêvajoyeke pir girîng de derbas dibin. Divê demokrasî û aştî bi hev re bibe. Heke demokrasî hebe aştî jî dê were vî welatî. Ez bang li desthilatê dikim ku gorên Seyîd Riza, Şêx Saîd û hemû windahiyên me aşkera bikin. Di vê pêvajoyê de ew gav girîng e. Em bang li desthilatê dikin ku vê gavê bavêjin. Banga 27ê Sibatê ya Rêberê Gelê Kurd Abdullah Ocalan dîrokî bû. Herî dawî jî birêz Ocalan rêxistina xwe vekişand derveyî Bakurê Kurdistanê. Lê ew pêvajo bi gavavêtina yek alî naçe serî. Divê desthilat jî gav bavêje. Ew gav çi ne; di serî de dikarin girtiyên nexweş berdin. Karkerên bi KHKê ji kar hatine dûrxistin vegerin ser karê xwe. Her wiha girtiyên ku cezayê wan qediyane bên berdan. Fîgen Yuksekdag, Selahattîn Demirtaş û girtiyên doza Kobanê dikarin werin berdin. Şeredariyên qeyûm tayinî şûna wan hatine kirin dikarin vegerin ser karê xwe. Ew gav weke gavên erênî dikarin werin avêtin. Lê mixabin heta niha ew pêvajo bi yek alî tê meşandin. Divê edî gav ji aliyê din ve jî werin avêtin.”
‘Divê komîsyon biçe Girava Îmraliyê’
Tuncer Bakirhan destnîşan kir kudivê komîsyon biçe Girava Îmraliyê û axaftina xwe wiha bi dawî kir: “Dewlet bi birêz Ocalan re hevdîtin dike. Lê çima komîsyon naçe Girava Îmraliyê. Divê demildest komîsyon jî biryar bide û biçe Girava Îmraliyê. Divê komîsyon bi wêrekî tevbigere. Em hevî dikin ew gav bê avêtin. Em ê li her qadê piştgirî û rêxistinkirina xwe xurt bikin. Dema em xwedî li hevdu derketin û di nava piştgiriyê de bin wê demê em ê behtir xurt bibin û pêşiya zext û sepanên pergalê bigirin. Em bi piştgirî û rêxistinbûyina siyaseta demokratik dikarin bi ser bikevin. Têkoşîna li dijî pergalê bi hev re dibe. Bi rêxistinî dibe. Em hertim nava piştgiriyê de bin, xwedî li hev derbikevin û bi rêxistinî tevbigerin.”
Piştî axaftinan xwarin hat xwarin û bername bi stran re bi dawî bû.
