Bi beşdariya zêdetirî 20 milyon kesan, dengdana giştî ya gera şeşemîn a hilbijartinên Parlamentoya Iraqê dest pê kir. Serokê YNKê Bafil Talebanî li dibistana Rewşen Bedirxan ya li Silêmaniyê dengê xwe bikaranî.
Li gor daneyên Komîsyona Bilind a Serbixwe ya Hilbijartinê ya Iraqê di dengdana giştî de 20 milyon û 63 hezar û 773 dengdder mafê dengdanê heye.
Ji vê hejmara dengdderan 2 milyon û 488 hezar û 51 kes li sê bazinên hilbijartinê (herêmên hilbijartinê) yên Herêma Kurdistanê Hewlêr, Silêmanî û Duhokê ne. Ev hejmar ji bilî Kurdên ku li herêmên dikevin sînorê Madeya 140 yên weke Kerkûk, Selahedîn, Nînova û Diyala û her wisa Bexda dijîne.
Komîsyona Bilind a Serbixwe ya Hilbijartinê ya Iraqê ji bo dengdana giştî 8 hezar û 703 navend û 39 hezar û 285 cih amade kiriye. Ji wan hezar û 543 navend û 6 hezar û 655 cih yên her sê bazinên hilbijartinê yê Herêma Kurdistanê ne.
Wê proseya hilbijartinên Parlamentoya Iraqê di bin ewlekariya hêzên ewlehiyê yên Iraqê de birêve biçe. Dê ji aliyê bi dehan saziyên ragihandinê, rêxistinên çavdêriyê yên navnetewî wê şopandin û çavdêriya hilbijartinê were kirin.
Li gor Komîsyona Hilbijartinê ya Iraqê wê proseya dengdana giştî saet 18:00an bidawî bibe, sindoqên dengdanê tên girtin û bi rêya elektronîk wê daneyên encamên hilbijartinê ji navenda serekî ya komîsyonê ya Bexdayê re werin şandin. Wê pûsûlaya sindoqan ji çavdêr û rojnamevanan re were dayîn.
Roja 9ê Mijdarê proseya dengdana taybet bi beşdariya milyonek û 340 hezar û 518 dengderên hêzên ewlehiyê û koçberan hat kirin. Li gor daneyên Komîsyona Bilind a Serbixwe ya Hilbijartinê ya Iraqê, rêjeya beşdariya dengdana taybet ya hilbijartinên Parlamentoya Iraqê ji %82 bû. Her wiha hezar û 841 binpêkirin di dengdana taybet de hatin tomarkirin.
Bafil Talebanî çû ser sindoqê
Serokê YNKê Bafil Talebanî li dibistana Rewşen Bedirxan ya li Silêmaniyê dengê xwe bikaranî û bang li welatiyan kir ku biçin ser sindoqên dengdanê.
Jinan xwestin jin biçin ser sindoqan
Dengderên jin ên li Kerkûkê bal kişandin ser rola û bandora jinan ya li nava Parlementoya Iraqê û daxwaz ji hemû jin û welatiyan dikin ku dengê xwe bidin jinan û jin li Parlementoyê daxwaza mafê jinan bikin.
