Enqere – Berdevka DEM Partiyê Ayşegul Dogan têkildarî komxebata partiyên çepgir û sosyalîst anî ziman ku armanca komxebatê dîtina rêbazên têkoşîneke hevpar e û got: “Plansaziya dema nû jî wê li gorî vê perspêktîfa firehkirina têkoşînê be. Divê em mil bidin milê hev û têbikoşin.”
Partiya Wekhevî û Demokrasiyê ya Gelan (DEM Partî), Partiya Tevgera Kedê (EHP), Partiya Kedê (EMEP), Federasyona Meclîsên Sosyalîst (SMF), Partiya Karkêrên Tirkiyeyê (TÎP) û Partiya Civaka Azad (TOP) li Enqereyê Komxebata “Em ji bo demokrasî û aştiyê tên ba hev û derfetên têkoşînê diaxivin” ku 2 rojan berdewam kir li dar xistin. Di komxebata ji 5 rûniştinan pêkhat de endam û nûnerên partiyên siyasî, komele, sendîka, akademîsyen, nivîskar, rojnameger li ser pêvajoya Aştî û Civaka Demokratîk, geşedanên li Rojhilata Navîn, pirsgirêka destûra bingehîn li Tirkiyeyê û rê û rêbazên têkoşîna bê kirin, nirxandin û nîqaş kirin. Piştî komxebatê encamname hat eşkerekirin û di encamnameyê de hat diyarkirin ku ew ê têkoşîna azadî û demokrasiyê berfirehtir bikin.
Berdevka DEM Partiyê Ayşegul Dogan a ku beşdarî komxebatê bû têkildarî armanca komxebatê û xebatên piştî komxebatê bên kirin ji Ajansa Welat (AW) re nirxand.
‘Armanca komxebatê dîtina rêbazên têkoşîneke hevpar e’
Ayşegul Dogan anî ziman ku di 2 rojên komxebatê de nîqaş û nirxandinên girîng derketine pêş û derbarê armanca lidarxistina komxebatê de ev tişt gotin: “Armanca komxebatê ev bû; derfet û rêbazên nû ya têkoşîneke hevpar wê çawa bên afirandin û birêvebirin. Rêbaza guherîna têkoşîna Tevgera Kurd bandor li ser siyaseta Tirkiyeyê bi giştî dike. Geşedanên dîrokî diqewimin. Di nav van geşedanan de em dikarin çi bikin. Çawa gav bi dewletê bidin avêtin, çawa dikarin hiqûqeke nû derxin holê, armanca sereke ya komxebatê jî ev bû. Fikir û rêmanên cuda hene. Nêzikatiyên cuda hene. Ew cudabûn divê weke dewlemendiyeke bê dîtin. Tevî vê cudahiyê em çawa dikarin werin li cem hev, çawa dikarin bêtir xwe bi rêxistin bikin û bi heztir bikin. Ev mijar hatin nîqaşkirin.”
‘Em dikarin ji bo demokrasî û aştiyê têkoşînek hevpar bikin’
Ayşegul Dogan destnîşan kir ku perspektîfa nû ya Rêberê Gelê Kurd Abdullah Ocalan jî bandor li ser komxebatê kiriye û got: “Daxuyanî û banga rêzdar Abdullah Ocalan li ser hemû xebat û çalakiyên tên lidarxistin dike. Ne tenê bandor jî nîqaşeke nû jî daye destpêkirin. Hemû partî jî tevî cudahiyan jî xalên ku em bikaribin bi hev re tevbigerin jî hene. Yek xala aştiyê û yek jî demokrasiyê ye. Aştî û demokrasî ji hevdu ne qut in. Çawa ku ji aliyekî ve meriv divê pêvajoya aştiyê bimeşîne ji aliyê din ve jî kêmasiyên demokrasiyê jî temam bike. Ew herdu xal jî ji bo hemû partiyên siyasî girîng in. Di van herdu xalan de em dikarin mil bidin milê hev û têkoşînê bikin.”
Xebatên ji niha şûn ve
Ayşegul Dogan diyar kir ku piştî komxebatê ew dê di rojên pêş de plansaziyên nû çêbikin û axaftina xwe wiha bi dawî kir: “Li vir tespîtên kêmasiyên diqewimin û hene hatin kirin. Divê li ser çi xalan bêtir em werin cem hev û nîqaşan bikin, ev yek derket holê. Ji bo nexşerêyek hevpar rêbazan bibînin. Em dixwazin dewlet ji bo pêvajoyê bi pêş ve biçe, gavan biavêje. Ji bo vê lez û beza me heye. Ji bo vê divê em teng nemînin. Derdora xwe fireh bikin. Plansaziya dema nû jî wê li gorî vê perspektîfa firehkirina têkoşînê be û em ê têkoşîna xwe mezintir bikin.”
