Amed – Husnu Tîmur ev 42 sal in karê cildirûnê dike û bi çavekî hunerî li dirûnê dinêre û ew di heman demê de karên hunerî jî dike û got: “Li şûn karê dirûnê dixwazim biçim ser çiyayekî rûnêm û wêneyan xêz bikim lê belê aborî li pêşiya xeyala min dibe asteng.”
Husnu Tîmur bi xwe ji Colemergê ye û lê ji ber kar û meseleyên malbatî tê li Amedê bicih dibe. Ev nêzî 40 salî ye li Amedê dijî û karê cildirûnê dike ango terzî ye. Ji ber pirsgirêkên aborî û ji bo debara jiyankirinê dest ji vî karî berdide û derbasî karên înşaetan dibe. Dema karên înşaetan dike jî ji ber çend pirsgirêkan dîsa dizivre ser karê xwe yê cildirûnê û ev nêzî 42 sal in vî karî dike. Husnu Tîmur dibêje ku ew di aliyê hunerî de jî gelek tiştan dike. Ew wêneyan zane xêz bike, peyekran çêke û teşe dide texteyan û şiklan jê çê dike. Bi çavekî êvindariyê li hunerê mezê dike. Tîmur diyar dike ku pirsgirêka aborî nahêle ku ew bi karên hunerî ve mijûl bibe. Hisnî Tîmur li ser kar û barên xwe axivî û diyar kir ku ew dixwaze pirsgirêkên aborî ji holê rabin û bi karê hunerî ve mijûl bibe.
‘Pirsgrêka aborî dikeve pêşiya xeyala min’
Husnu Tîmûr da zanîn ku ew di sala 1976an de ji Colemergê hatiye Amedê û ji ber derfetên aborî û rewşa xwendina zarokên xwe neziviriye Colemergê û wiha got: “Ez êdî li Amedê me û min ev terzîxane ji xwe re vekir. Min di sala 1983yan de li Colemergê dest bi vî karî kir. Piştre min ev kar berda û dest bi karên avahiyan kir. Lê dema ev hikûmeta diz hate ser kar, ez fikirîm û min got an ez ê berdewam bikim diziyê bikim, an jî ez ê berdim. Min dest ji karê avahiyan berda û dîsa ez zivirîm ser karê terzîxaneyê. Kesekî karê dirûnê nîşanî min neda, ez bi xwe hîn bûm. Min heya niha gelek kar kirin e û ez bûme pisporê karê xwe. Hinek aliyê min ê hunerî jî heye. Ez wêneyan xêz dikim, hunera neqişandina daran jî çêdikim û şikilan didim texteyan. Karê dirûnê bi kêfxweşî nakim lê ji aliyê aborî ve ez neçar dimînim û vî karî dikim. Xwesteka min ew e ku ez karên hunerî bikim. Ez dixwazim biçim ser çiyayekî rûnêm û wêneyan xêz bikim, lê mixabin pirsgirêka aborî dikeve pêşiya xeyala min.”
‘Ez bi çavekî hunerî li karê dirûnê dinêrim’
Husnu Tîmur diyar kir ku yên bixwazin karê cildirûnê bikin divê bi pratîk û hûnerî nêzî karê dirûnê bibin û axaftina xwe wiha domand: “Yên dixwazin ku vî karî bikin divê bi xwestek û pratîk bin. Karê dirûnê û hunerê ji bo min yek e. Ez bi çavekî hunerî li karê dirûnê dinêrim. Dema tu bi çavekî hunerî li dirûnê binêrî wê çaxê karêkî baş derdikeve holê.”
‘Serdestên me çand û hunera me dizî ne’
Husnu Tîmur bal kişand ser astengî û qedexeyên li ser çand, huner û jiyana gelê Kurd û di dawiyê de wiha got: “Serdestên me her tim xwestin gelê Kurd bindest bimîne. Serdestan dîroka me, çanda me û jiyana me dizî ne. Dema ku mafên gelê Kurd hatin mîsogerkirin, netewên ku diziya çand û hunera me kirine wê bêçare bimînin. Em xwedî dîrok in, hêza me di her aliyê de heye. Pirsgirêka me Kurdan jî ew e ku em nabin yek. Di bingeha van hemû tiştan de pirsgirêka aborî heye. Lê divê em hay ji hêza xwe jî hebin. Heke înkar û bişaftin li ser gelê Kurd nebûna wê di warê çand û hunerî de gelek pêşketîbûna. Heke her çar aliyên Kurdistanê bibine yek tu kes nikare hêza wan bişkîne û êrişan li ser wan bike.”
