Êlih – Nûnerên Platforma Saziyên Demokratîk ên Êlihê banga tevlibûna mitînga “Civaka Demokratîk û Aştî” ya dê di 12ê Cotmehê de li Êlihê pêk were kirin û gotin: “Mitînga me daxwaza azadiya fizîkî ya Rêberê Gelê Kurd Abdullah Ocalan dike.”
Li Êlihê di 12ê Cotmehê de bi pêşengiya Platforma Saziyên Demokratîk dê mitîngek bi dirûşma “Aştî û Civaka Demokratîk” were lidarxistin. Di mitîngê de dê azadiya fizikî ya Rêberê Gelê Kurd Abdullah Ocalan were xwestin. Ev çend roj in amadekariya mitîngê bênavber didome û îro dê amadekarî bi dawî bibin. Rêveber û nûnerên partiyên siyasî ku pêkhateyên Platforma Saziyên Demokratîk in ji Ajansa Welat re axivîn û gel vexwendin mitîngê.
‘Em ê bibêjin azadiya Serokatî azadiya gelê Kurd e’
Aktivîsta TJAyê Havva Can diyar kir ku girîngiya mitîngê ew e ku daxwaza azadbûna gelê Kurd û azadiya fizîka ya Rêberê Gelê Kurd Abdullah Ocalan dike û wiha axivî: “Ji bo gelê Kurd jî wekî tevahî gelên din azad bijî, em ê vê mitînga xwe li dar bixin. Îro Rêberê Gelê Kurd barek giran hildaye ser milê xwe. Divê em jî li gorî ruhê pêvajoya bi rola xwe rabin. Em doza azadiya Rêberê xwe dikin û tevahî hevalên xwe dikin. Heta ku Serok azad nebe tu kes azad nabe. Ji bona vê em ê roja Yekşemê bi yek dengî li pêşiya DEM Partiyê mitînga xwe pêk bînin. Em ê bibêjin azadiya Serokatî, azadiya gelê Kurd e. Em bang li gelê Êlihê dikin ku werin li mitîngê dengê azadiyê bilind bikin.”
‘Em ê dengê aştî û azadiyê bilind bikin’
Endamê Meclîsa Partiya ya DEM Partiyê Abdullah Gulgen jî destnîşan kir ku li darxistina mitîngê ji bo balê bikişînin ser çareserkirina pirsgirêka Kurd û wiha got: “Em vê pêvajoya çareseriyê gelek girîng dibînin. Komplo li ser birêz Abdullah Ocalan pêk hatibû. Ji bo em bêjin va ev komplo pûç bûye, em ê vê mitîngê li dar dixin. Her wiha ji bo ku nasnameya gelê Kurd were naskirin, em roja yekşemê li benda gelê xwe ne. Em ê dengê aştiyê bilind bikin û azadiya birêz Abdullah Ocalan bixwazin.”
‘Gelê me bila banga aştiyê bike’
Hevserokê Rêxistina DEM Partiyê ya Navçeya Navendî ya Êlihê Nurullah Mermertaş jî anî ziman ku ew e mitîngê ji bo azadiya Rêberê Gelê Kurd Abdullah Ocalan li dar dixin û got: “12ê Cotmehê em ê li pêşiya avahiya DEM Partiyê mitîngê li dar dixin. Em bang li gelê xwe dikin ku werin dengê xwe bilind bikin. Mitîng ji bo azadiya fizîkî ya birêz Abdullah Ocalan e. Ji bona wê em bang li gelê xwe dikin; bila werin banga aştiyê bikin.”
‘Bi çoş tev li mitîngê bibin’
Hevşaredarê Êlihê Yeşîl Işik ê ku qeyim tayînî şûna wî hatiye kirin jî banga beşdariya mitîngê kir û got: “12ê Cotmehê em ê ji bo ‘mafê hêviyê’ bikeve pratîkê û azadiya fizikî ya Rêberê Gelê Kurd pêk were, li qada mitîngê bang bikin. Em ji tevahiya xelkê xwe re dibêjin bi awayek coş werin tev li mitînga xwe bibin.”
